Mizoram State BJP President Vanlalhmuaka chuan tun hnaia sorkar laipui dawr hlawhtling anga insawi Mizoram state sorkar hruaitute chu an insawi anga hlawhtling an nih loh thu a sawi.
November 20, 2021 – December 13, 2021 chhung khan Vanlalhmuaka hi Delhi-ah zinin, sorkar laipui hruaitu hrang hrangte a dawr a. Hemi chungchangah nimin khan an pisa-ah thu thar thehdarhtute kawmin, “Central ministry-in Mizoram state sorkar min hmuh/treat dan pawh ka hriat phah a ni. Mizoram state sorkarin report an pek ang kha a ni chiah lo,” a ti.
Sorkar laipui atanga scheme an rawn pek ho hi a nih tur anga a hman loh dan te, Mizoram sorkarin contract work leh tender atana sum a pek dan tam tak central lamin an hre lo emaw an tih kha an lo hriat thu, Vanlalhmuaka hian a sawi a. “Heng scheme min pekte hi kalhmang nei vek ni mah se, langtlang sorkar hnuaiah langtlang taka kalphung mumal tak a neih loh zawng zawngte sorkar laipuiin a hriat avangin, tuna kan sorkar hi suma a harsat phah chhan a ni,” a ti.
Vanlalhmuaka chuan Mizoram sorkarin sorkar laipui atanga scheme lo kalte a hman that tawk loh dante chu Prime Minister Narendra Modi hnenah a thlenin heng zawng zawng hi monitor a tul thu a thlen chu, a lo bawhzui tur thu leh hma a lo lak tur thu a lo hrilh niin a sawi.
Bairabi atanga Sairang rel kawng siamtu contractor te leh railway officer te hnathawh dana a lungawi loh thu Union Railway Minister Ashiwani Vaisnaw hnena a thlen chungchangah, “Rel kawng siam zawh hun an sawn reng kha kan duh lo. An sawn reng chhan hi contractor te leh officer ho inkarah sum siamna tur atana inmawngzawma thil tam tak inthawhtirin an awm niin a lang,” tiin The Zozam Times zawhna a chhang.
“Vawiin ni thlenga land compensation thubuai hrin chhuaktu chu railway-a thawktu leh helaia tute emaw thiltithei deuhten sum siam nan an hmang nia a lan avangin CBI chhuitir turin kan thlen a. He thilah hian kan state officer te pawh an tel thei a, tute pawh nise jail bang an zut a nih pawhin pawi ka ti lo,” tiin, central pawisa hmanna reng reng hi chief minister remtihpuina tel loa a tih theih loh thu a sawi bawk.
Mizoramah helicopter tam zawk service tir tua Union Civil Aviation Minister Scindia hnenah a thlen thu sawiin Vanlalhmuaka chuan, “Tuna Regional Connectivity Scheme hnuaiah man tlawm zawkin mitin thlawhna kan chuan theihnan state hrang hrangin an kalpui, proposal te an siam a ni. Mahse, Mizoramah sorkar chuan vawiin thlengin proposal an la siam lo a, proposal thehlut turin Mizoram chief minister thurawn pe turin min rawn a ni,” a ti.
Vanlalhmuaka hian Myanmar raltlang chungchang sawiin, “Mizoram chief minister khan Minister of External Affairs Jaishankar a hmu loa, keini chuan kan sawihopui. Zep thu a cheng loa, anni chuan tanpuina pawisa in an zuk dil. Keini chuan damdawi emaw, chaw emaw, an mamawh zawk tak nia kan hria a, chu chu MHA leh state sorkar a ring lo a nih pawhin NGO rintlak tak hnuaia tanpuina kalpui dan tur ruahman turin kan ngen,” tiin, hemi atan hian officer pakhat an detail tak thu a sawi.
Mizoram State BJP President hian Union tribal Minister pathumte a ruala meeting a neihpuinaah dan ang thlapin a hun takah tribal scholarship pek chhuah a nih dan te an sawi ho thu a sawi a. Union Rural Development Minister hnenah Mizorama MGNREGA kalpui dante leh PMAY dawng tur dik takin an dawn leh dawn loh te enfiah a, thil awm dan a hnena submit tura tih angin tunah hian hma an lak mek thute a sawi a. Union Minister of State Defence te, DONER leh MSME changtu minister te nen hlawhtling taka inkawmna an neih dan te a sawi bawk a ni.