Basketball Federation of India buatsaih 71st Senior National Basketball Championships Men & Women – North East Zone chu December 16, Ningani hian Shillong, Meghalaya ah neih a ni dawn a. Mizoram Basketball Association chuan Mizoram aiawh tur mipa leh hmeichhe team te Thawhlehni khan a tir chhuak.
Inkhelh dan tur
India ram pum hi zone panga North Zone, South Zone, East Zone, West Zone leh North East Zone ah te then a ni a. Zone tin te hian December 31, 2021 hma in Zone Championship hi neih zawh hman tur a ni.
North, South, East leh West Zone-ah a sang pathum team, North East Zone a champion team, Services Team, Indian Railways Team leh a thlengtu team te nen an vaiin team 16 in Senior National Regional Basketball Championships hi January 23 atanga 30 hian Chennai, Tamil Nadu ah an khel leh ang.
An inpeih
Hmeichhe team te hi selection neih a nih zawh hnuah November 16 atang khan an inpuahchah tan a, tum 25 vel chu an practice an nei ho hman.
Hmeichhe team head coach Marc Lalthlamuana Sailo chuan, “Tun tum chu hmeichhia hi a tha thei ang ber a inthlang kan ni a. Zirna avanga hman lo pahnih khat awm mahse a tha thei ang bera kan ngaih chu kan in siam.
“A sang thei ang ber thlen tum in hma kan la mek zel a. Mizoram ina a hriat reng tur chanchin lawmawm neih tum in kan tang. Kan theih bak Pathian in min pui a nga a sang thei ang ber thlen kan tum e.” tiin hmeichhe team dinhmun a sawi.
Mipa team te hi November 19 atang khan in puahchah tan in tum 20 chuang an practice ho hman bawk.
Mipa team head coach KC Lalliantluanga chuan, “Mizoram ah nasa takin basketball a thang a, Mizoram Super League kan neih zarah kan Mizo inkhel miten hnamdang mahni aia pianphunga sang leh lian zawkte an lo khelhpui ta zeuh zeuh hian hma min ti sawn lehzualin ka hria. Chuvang chuan tun tumah pawh kan inkhel mi neih that ber ber te kan hruai dawn avang leh theihtawp chhuaha kan inpuahchah bawk avang hian hlawhtlinna kan chan ngei ka beiseiin ka ring tlat a ni.”
“Kan inkhelhpui tur team te eng ang nge an nih kan hriat mai loh avang leh an dinhmun kan hriat mai loh avangin sawi lawk erawh a harsa.” tiin mipa team dinhmun a sawi.
Mipa team-ah hian captain ah SABA championship a champion India senior team zinga tel Zarkawt BCA player pawimawh leh MSL MVP lo ni tawh Lalrina Renthlei a awm a. Vice captain ah Tuikual South Basketball Club captain F. Zodinthara a ni.
Zarkawt BCA atangin Matthew Sailo, Zonuna leh Faka te an awm a, Khatla TBL atangin |hazuala, Rinchhana leh Michael-a te an awm tel a. Tuikual South atangin R-a leh Dede-a te an awm a, Mission Veng Hotshots atangin Isle-a leh Afaka te an awm bawk.
India team a khel tawh, nationals championship lo kal tawh leh Mizoram Super League a player pawimawh te an nih hlawm avangin beiseina sang tak MBBA chuan a nei.
A dang zel
Mipa team enkawltu head coach hi Mizoram atanga tawnhriat lo nei tawh NIS chhuak KC Lalliantluanga niin Asst. Coach ah Zarkawt BCA tum thum champion pui tawhtu Lalruatfela a awm.
Hmeichhe team enkawltu head coach ah Zarkawt BCA Asst. Coach leh National Sub-Junior Basketball Championship 2019 a Mizoram champion pui tu Marc Lalthlamuana Sailo a ni a. Asst. coach ah player anga Khatla TBL champion puitu leh lo enkawl tawh tu Lalrinzuala a ni ve thung.
Mizoram team mamawhte hi Pu Saichhunga te unau, Dawrpui Vengthar, LB Associates Bungkawn, Samoo Dawrpui, Zote Honda leh Zothan Auto works ten an sponsor a. MBBA chuan an chungah lawmthu an sawi nghal bawk.
Team List:
Senior Women
- Lallawmzuali Sailo (C) – Khatla
- Christina Lalhmingmawii (VC) -Bungkawn
- Saidingpuii Sailo -Bungkawn
- Lalrinhlui – Chawlhhmun
- Naomi Lalhriatpuii – Khatla
- Vanlallawmawmi – Dinthar
- ST. Lalchhanhimi – Nursery
- Lalramropuii – Bawngkawn
- Malsawmkimi Zote – Ramhlun Vengchhak
- Laltlanhlui Sailo – Ramhlun Venglai
- Lalṭhazuali – Ramthar
- Chawnghmingliani – Mission vengthlang
Coaching Staff:
Manager – Saithanzuali – Dawrpui Vengthar
Coach – Marc Lalthlamuana Sailo – Zarkawt
Asst. Coach – Lalrinzuala – Dawrpui Vengthar
Senior Men
- Lalrina Renthlei (C) – Tuikhuahtlang
- F. Zodinthara (VC) – Tuikual South
- Vanlalthazuala – Bungkawn
- Zonunsanga – Ramthar
- Zonunsanga – Tuikhuahtlang
- Vanlalrinchhana – Zotlang
- Lalnunpuia Renthlei – Bungkawn
- Dennis Lalmuanpuia – Dawrpui Vengthar
- K. Lalfakzuala – Mission Veng
- R. Lalfakawma – Leitan Veng, Durtlang
- Michael Liansanga – Serchhip
- Matthew Remtluanga Sailo – Zarkawt
Coaching Staff:
Manager – K. Zorammuana – Kolasib/Bawngkawn
Coach – KC Lalliantluanga – Armed Veng South
Asst. Coach – Lalruatfela – Dawrpui
Fixture:
Men:
- 16.12.2021 (Thursday) – 09:00 AM
Mizoram vs Tripura - 17.12.2021 (Friday) – 11:30 AM
Meghalaya vs Mizoram - 17.12.2021 (Friday) – 3:30 PM
Nagaland vs Mizoram - 18.12.2021 (Saturday) – 11:30 AM
Manipur vs Mizoram - 19.12.2021 (Sunday) – 4:30 PM
Assam vs Mizoram
Women: - 16.12.2021 (Thursday) – After Inauguration
Meghalaya vs Mizoram - 17.12.2021 (Friday) – 1:30 PM
Mizoram vs Assam