Ram neitute harsatna chinfelsak thuai ni teh se
NH 302 kawng laih hna thawh mekah sorkar in an inremna anga zangnadawmna an pek theih loh avangin Lungsen Area Land Owner Coordination Committee for NH 302 (LALOCC-NH 302) chuan kawng laih hna thawktute chu chhunzawm thei lo turin an chawlhtir rih a, an kal zel dan tur erawh an hre lo thung.
LALOCC lam sawidanin November thla chhunga zangnadawmnate hi lut tura tih a nih laiin vawiin thlengin an account-ah zangnadawmna pawisa a la lut thei lo a, chuvang chuan hnathawh mek leh thawh chhunzawm tur pawh chawlh lailawktir an ni a, sorkar hian ruahmanna felsa awm lovin ram neitute hi inremna a ziahpui mai em ni tih ngaihdan a awm theih phah ta hial a ni.
Lungsen area-a ram neitute hian sorkar nen an inrem angin November thla tir atang khan an ram pawh phal takin an lo laihtir tawh tih an sawi a, December ni 1 khan an ram pass orginal pawh Lunglei Revenue Office-ah CALA duh dan angin dah luh a, an account pawh check fel tawh a ni a, hetihlai hian thawm a awm leh tak si loh avangin hnathawkte hi an chawlhtir tih an sawi a, ngaihtuah zui leh an harsatna chinfelsak thuai hi sorkar tih tur hmanhmawh niin a lang.
Inkalpawhna kawngpui hi hmasawnna kailawn hmasa pawl a ni a, a that thuai pawh mitin duh dan a ni. Chutiang a nih hre chung chuan helai ram neitute pawh hian phal takin an ramte an pe phal a, mah se an innghahna ve pakhat zangnadawmna pek kawngah erawh sorkar in a tih tur a ti ve ta mai si lo hi a zia lo hle mai a, a rang lama chinfelsak thuai an nih theih nan leh hnathawh chhunzawm a nih thuai theih nan an harsatna chinfelsak ni thuai bawk teh se.