Sorkar laipui chuan India hmarchhak state zngah Assam nena ramri buaina nei state pali an awm thu Thawhlehni khan Lok Sabha rorel inkhawm a sawi.
Parliament rorel inkhawma sorkar laipuiiin a tar lan dan chuan Assam nena ramria buaina neite hi Arunachal Pradesh, Nagaland, Meghalaya leh Mizoram te an ni.
“Ramri buaina hi Assam-Arunachal Pradesh, Assam-Nagaland, Assam-Meghalaya leh Assam-Mizoram te a awm a ni,” tiin sorkar hian a sawi.
“Thu kan dawn chinah chuan ramri rinna dik tawk lo vanga buaina leh ramri piah lam ve vea mahni ram chin nia ngaihdan inang lo a awm a, state thenkhat inpuh tawnna phei chu a na hle,” a ti bawk.
Sorkar laipui chuan heng state ramri buainaah hian tharum thawhna pawh a thleng ‘zeuh zeuh’ niin a sawi bawk.
“An ep lama mite chetna lohna lantirna leh tharum thawhna hi ramri buaina hmunah hian a thleng zeuh zeuh thin a ni,” a ti.
Tun hnaia state ramri buainaa tharum thawhna thleng lian ber chu July thlaa Mizoram leh Assam intihbuaina kha a ni a. Mizorama Vairengte daia state pahnih police inepten silai hmet puakin Assam police paruk vel an thi a, hliam tuar tam tak zingah Cachar SP pawh a tel a ni.
Assam leh Meghalaya buainaah erawh state pahnih hian committee siamin kal zel dan tura an rawtte pawh sorkarah an thlen tawh.