Khawpui chhunga traffic jam nasa tak sutkian nana sorkar scheme siam, Parking House Support Scheme (PAHOSS) hnuaia Rs. nuai 121 senga lirthei 380 dah theihna, parking house sak zawh tawh 11 chu nimin khan hawn a ni.
PAHOSS hi Mizoram sorkar State Flagship Programme a ni a, khawpui chhunga traffic jam nasa tak sutkian nana parking space tam zawk siam chu a thil tum niin, PAHOSS hnuaia parking house sak tanpuina dawng tur thlan fel tawh mi 402 zinga mi 11-te chu sum an hmuh tur ang pek fel an ni a, luah theia lirthei dahna an sak zawh tawh chu nimin khan hawn a ni ta a ni.
Parking house sak zawh tawh 11-ah hian LMV 71 leh two wheeler 309 dah lenna a ni a. Parking house sak tanpuina dawng zingah K.Lalduhawmi, Republic Vengthlang chuan sum a dawng tam ber a, a parking house-ah hian LMV 12 leh two wheeler 72 dah theih a ni.
Parking house sak zawh tawh hawnna pui ber chu Hyve-Aizawl City Hall-ah neih a ni a, he huna khuallian, Chief Minister Zoramthanga chuan PAHOSS scheme thil tum chu tihhlawhtlin zel a nih theih nan leh khawpui hmasawnna ruhrel din tura hmalakna hrang hrangte tihlawhtling turin sorkarin theihtawp a chhuah zel tur thu a sawi.
Zorama chuan mi mal, pawl leh ram hmasawn nan hmathlir tha neih a pawimawhzia sawiin, thil tha ngaihtuah chhuak tura mahni remhriatna hman thiam kawngah theihtawp chhuah a pawimawh thu sawiin, “Hmasawnna dangtu anga langte pawh hmasawnna atana tangkai a hman zawk dan zawn thiam a tul,” a ti.
Deputy Chief Minister Tawnluia pawhin thu sawiin, hripui leng avanga PAHOSS hnuaia tanpuina dawng thenkhat installment pek tur, la pek theih loh awm chu pawi a tih thu sawiin, hmabak awm ang angte zawh thuai a nih theih nan sorkarin theihtawp a chhuah zel tur thu a sawi a, he tanpuina dawngtute chu tha taka enkawl zui ve tur an nih thu a sawi.
He huna thusawitu dang, Aizawl Mayor Lalrinenga Sailo chuan parking house sakte chu AMC vil zui tura dah a la nih dawn tih leh hemi atan hian inkaihhruaina siam tawhte chu khauh taka kalpui a nih tur thu a sawi.
Parking house hawnte hi an awmna veng azirin zone pathum – North, South leh West-ah thenin, chief minister chuan north zone-a mi a hawng a, Deputy Chief Minister Tawnluia chuan west zone-a mi a hawng a, Aizawl mayor-in south zone-a mi a hawng bawk a. Hemi hnu hian a hawnna pui ber chu Hyve-Aizawl City Hall-ah neih a ni leh ta a ni.