I taksa a tur (toxins) awm tur ven: Ruih theih thil leh thlum leh thau, kaw chhunga tur a chang mai thei lakah fimkhur ang che.
Exercise lak fo: Exercise han tih hian a hun taka, nitina tih makmawh leh phurrit atana hmang kher lovin. Hlim taka thiante nena park-ah emaw kawng kalte leh, mahni inchhunga TV hmaa lam dawrh dawrh te pawh a tangkai em em a ni. Thiante nena hlim taka inkawma nui leh tawng bawrh bawrh chunga exercise tih hian taksa buk rih lam a ti tlem duh bik.
Mi dangte nen inzawmna tha tak neih: Lungnatna (heart disease) siam theite zinga a zahve hi thiante emaw chhungte zinga awm lova, mahni chauhva khawhar taka awm a inngaihtuah ngut ngut atanga chhuak a ni. Hlim lohna leh rilru ti na tute a awm lo thei lo. Heng rilru hahna te hi mahni chauhva kan awm aiin thiante emaw midangte bula kan awm hian a hrisel zawk.
Chawlh hahdam (relax) a tha: Eng hna pawh thawk la, hahdam taka awm diai diaina hun neih hi a pawimawh. Hla mawi tak ngaihthlak emaw, pangpar huan leh thinghnah mawi tak tak hmuna awma, Pathian thilsiam ropuizia chhut fote hi chawlh hahdamna dangdai deuh a ni a, rin aiin mihring a ti hrisel thei.
I hriselnaah mawh i phur: Daktor ten damdawi ei tura an chawh che chuan, kha damdawi hnathawh dan leh, kha damdawi vanga natna kai chhuak thei (side effect) ngun taka zirchian tur. Kan Chunga thil thleng a tha zawng-a lak thiam: Kan nitin nunah hian engkim a kal tluang reng thei lo. Harsatna leh damlohna kan tawh pawhin a tha zawnga lak theih hram hram hi hrisel nan a pawimawh a ni. Thian kawmah fimkhur la, engkim a tha zawnga la thiam mite kawm rawh.
Thil tih châk zawng tih: I thiltih chak zawng tak, hnathawh chak zawng, tuizawng emaw mahni nuam tih zawng tak mai han tih hi hrisel nan a tangkai. Hnathawhna emaw hlawh tam deuh zawkna pawh a ni mai thei, nuam ti lo chung chunga thawh ai chuan hna dang, a aia hlawh tlem deuh zawk pawh a tih chi ang.
Ngaidam rawh: Nangmah leh nangmah in ngaidam la, i chhungte, thiante, leh thenawm khawvengte i rilru an tih-natna reng reng, engvang pawh nise ngaidam thei hram hram rawh. Kan Lalpa Isua Krista pawh khan Kross lera khai kana a awm lai khan, “Ka Pa, an ni hi ngaidam rawh an thiltih an hre lo a ni,” a tih tawk twk kha. Kan thinrimna emaw, miin kan chunga an tih kan duh loh zawng emaw te vawn rengna hian rilru leh nun a ti chau zo vek thei a ni.
Rilru leh taksa hi a inzawm tlat avang hian heng thinurna te kan vawn renga kan theihnghilh theihloh chuan, natna tha lo vei a awl lehzual thin.