Railway Minister Ashwini Vaishnaw chuan Bairabi-Sairang relkawng siam hna tihchak tum a nih thu nimina parliament thutkhawm neihah Mizoram Lok Sabha MP C Lalrosanga a hrilh.
Bairabi atanga Sairang relkawng siam chungchanga Mizoram MP C Lalrosanga zawhna chhangin Vaishnav chuan Sairang thleng relkawng phah hna kal mek chu thawh zawh hun tur tak sawi theih ni lo mah se a chak thei ang bera thawh a nih dawn tih a sawi.
Zawh belhna chhangin minister chuan rel kawng hi kilometre 51.38-a thui tur, Rs vbc 6,527 senna tur nia chhut a nih thu a sawi a, “Rs vbc 4,343 sen a ni tawh a, kum 2021-22 chhung atan Rs vbc 1,036 ruahman a ni,” a ti.
Rel kawnga lei dawh tur zatte sawi tel bawkin, “He relkawngah hian lei lian dawh tur 55 a awm a, lei tê 87 dawh tur a awm a, leiverh 32, a vaia a sei zawng km 12.65 a awm dawn,” tiin a sawi.
Railways minister chuan Bairabi atanga Mizoram chhim lam thlenga relkawng siam rawt chungchangah ama office-a sawipuiah MP chu a sawm a, a hnua zawhna dang chhangin Vaishnaw chuan Assam-a Karimganj district chhunga mi, Dullav-cherra atanga Mizorama Zamuang thleng, Km 30 vela thui tur relkawng siam rawt chungchangah amah sawipui turin hemi chungchang zawttu Karimganj bial MP Kripanath Mallah chu a sawm bawk.