Aizawl: Congress party chuan an president atanga chawl ta, Dr. Lal Thanhawla, Congress Working Committee (CWC) member atana ruat a nih lawmpuina leh chawimawina hun an hmang.
Nimina Lal Thanhawla Auditorium-a hun hmanah MPCC president thar tur, Lalsawta chuan thu sawiin president kal chhuak tur, Lal Thanhawla chu hruaitu ropui tak a nih thu a sawi a. “Inthlanaa kan chak lo a nih pawhin chhuanlam a siam ngai lo a, mipui duhthlanna a zah em em a. EVM dik loh vangah te a la puh ve ngai reng reng lo, kan chak lohna hi dam takin a hovin kan pawm mai thin,” a ti.
Lal Thanhawla’n hlawhtlinna tam tak a lo neih tawh dan sawiin Lalsawta chuan, “MLA certificate vawi 12 zet lo dawng tawhin, Mizoram kohhran hrang hrangten kum 1994 a Gospel Centenary lawm an tum avangin a lawmna leh election a innan buai loh nan ama term pawt tawiin kum 1993-ah min inthlanpui hial a ni. Hetiang taka hruaitu ropui kan nei hi Congress party kan vannei em em a ni,” a ti bawk.
Amah chawimawina hun buatsaih a ni chu lawmawm a tih thu Dr Lal Thanhawla chuan a sawi a. Mizorama hmasawnna lian tham zawng zawng deuhthaw siam chhuaktu chu Congress party an ni tiin, “Mizoramin power a thar chhuah zawng zawng deuhthaw te, airport te, university te, zirna in pawimawh zawng zawng te, medical college te, kawngpui pawimawh zawng zawng leh ram dang nena insumdawn tawnna tur zawng zawngte pawh hi Congress party hnathawh deuh vek a ni,” a ti a. Congress party mipuite chu hnual mai lo tur leh, thangthar lo awm zel turte tana an hnathawhte thlir chunga inchhuang hle turin a chah a ni.
Dr. Lal Thanhawla chawimawina hun hi hmana lawmthu sawia hun khartu, Zodintluanga Ralte, MLA, MPCC treasurer ni bawk pawhin thu sawiin, khawvel hmun dang tam takah lalna duh vangin thisen leh nunna a luangral thin laiin, Lal Thanhawla erawh chuan zahawm takin thuneihna chu midang a kian thinin, Mizoramah remna leh muanna a thlen phah thin thu a sawi.
Dr. Lal Thanhawla hi kum 1973-ah kum 31 mi chauh niin MPCC President a ni tan a, kum 6 chhung Hrangaia leh Lalduhoma-ten President nihna an chelh tih loh chu kum 1994 atanga kum 2021 thlengin, kum 41 chhung MPCC President a ni.
Kum 1978-ah kum 36 a upa a nihin Champhai bial atangin MLA-ah thlan tlin a ni a, vawi 12 zet bial hrang hrang atangin MLA-a thlan tlin a lo ni tawh a, Mizoram Chief Minister vawi 5 a ni tawh bawk.
Lal Thanhawla hian kum 1986 khan Mizoramah remna leh muanna a awm theih nan Chief Minister nihna chu MNF President Laldenga a lo kian a, Manipur a Kuki leh Paite hnam indonaah a hmalakna avangin remna lo siam tawh bawkin, a hmalakna avangin kum 2018 khan HPC(D) leh Mizoram sorkarin remna an siam phah bawk.