Coronavirus hripui leng mek chu American 8,00,000 chuangin an thihpui ta a, ram khata thihpui tamna ber an ni.
United States-ah hian Thawhtanni khan Covid-19 kai hi mi maktaduai 50 an tling ta bawk.
Thi zinga a tam ber hi invenna la ve lo leh kum upate an ni a, nikum aiin kuminah thi an tam zawk bawk.
US-ah hian hri kai hrim hrim pawh tun hnaiah an pung chak leh mek.
Thi thar mi 1,00,000-te hi chawlhkar 11 liam ta chhunga mite mai kha an ni a, nikum thlasik aiin tun thlasikah hian thi an pung chak zawk hle.
Johns Hopkins Bloomberg School of Public Health-a epidemiologist Dr Keri Althoff chuan, “Mipui tam zawkin kan taksaa he hri do theihna awm ang chi hi kan neih hma chuan kai kan pung zel dawn. A tawp zawnga sawi chuan, a tawp kan la thleng lo tih a ni mai,” a ti.
Ni 650 chuang liam taah khan Covid-19 vanga American thi hmasa ber hi Seattle, Washington-ah chhinchhiah a ni a. Thuneitute chuan he mi hma pawh hian thihpui an awm ngei erawh an ring.
Nikum thlasika invenna damdawi hmasa ber, Pfizer vaccine pek chhuah tan a nih hma khan mi 3,00,000 chuangin an thihpui hman tawh.
April, 2021 khan vaccine pahnih – Moderna leh dose khat chauh lak ngai, Johnson & Johnson chu hman tan leh a ni a. Vaccine pathumte hi puitling chin tana hman theih vek a ni.
US-a khawpui lian tak tak, Boston leh Washington DC tih vel ai pawhin hri leng thihpui hi an tam tawh zawk a. Indopui II-na hun laia American thi let dawn an thi tawh tihna a ni.
US dawta thihpui tam berna chu Brazil niin mi 6,16,000 an thi tawh a. India-ah mi 4,75,000 chuangin an thihpui tawh bawk.
Johns Hopkins University-in a chhinchhiah dan chuan mihring cheng zat atanga chhuta thi tam lamah chuan US hi 20-na daih a ni thung a. South American ramte leh European ramte chu an dinhmun a chhe zawk.
US-a Covid-19 thihpui tam hun hi a len thawh thum anga sawi theih a ni.
A hmasa ber chu New York City-in na taka a tawrh tum, April, 2020-a a vanglai an tawn kha a ni a. A hnu lawk nipui leh favangah erawh a kai leh thihpui an tlem zui a ni.
A thawh hnihna chu nikum nipui kha niin kum tawp chawlh hmanga mipui zin leh pun khawm tam hnu a ni a. A vanglai, January, 2021 vel khan ni khatah mi 3,000 chuang thih tumte pawh a awm.
Vaccine la an pung a, hei vang hian thal laiin a kai leh thihna thleng a tlem leh a; mahse, July thla vel atang khan inkai awlsam leh natna na tak thlen thei, Delta variant darhin nasa takin an thihpui leh.
Covid-19 avanga US-a thite hi kum upa an tam ber a, kum 65 chin chung lam zingah, invenna la ngei pawh 100 zela pakhat chuan an thihpui ang a ni.