- PL Liandinga
Ngai pawimawh lo mah ila lo her chhuak tho tho, nghakhlel sateh mah ila a hunbi baka lo her chhuak lo Krismas chu kan lo thleng leh dawn ta reng mai. A ngai pawimawh lo pawl tak tan pawh Mizoramah chuan ngaih pawimawh loh theih loh Krismas hi kan tan hian a hlu hle a ni. Mi tam berin an ngaihven a, mi tam berin hun chhiar nan an hmang a, mi tam takin tehfung atan an lek miauva.
A lunglenthlak zawnga thlir chuan Krismas hrim hrim hi a lunglenthlak a, Mizovin kan lunglenpui em em tih kan hla hrang hrang atangin a hriat theih a. Kan mimal nunah pawh lunglenpui fe fe hi hmuh tur an awm teuh bawk. Keima mimal phei chuan Krismas hi lunglen nan kan hmang a, ka ngaihtuah ringawt pawh hian ka lung a leng thin. Thlasik ni eng te, tlangsam par te, kawldai par te, nipui par te leh vaivut khu ninawm tak thleng hian ka lung a tileng.
Krismas lunglenpuitu dang leh chu lusun te an ni ngei ang. Thalai, nula tlangval, thisen lum leh taksa chak tha lai ten an phurpui tluk zetin lusun te tan chuan lunglen a tina ve thung a. Mi zawng zawng phur leh thatho ni a hriat lai tak mai a tuar bik leh khawhar bik ni a inhriatna chu a na lo thei lova, thinlung a fan ngei ngei thin. Krismas a lo thlen emaw, a lo thlen dawn hnaih emaw chuan chhungkua te kan han inhui khawmin chawhlui te kan han kilho a, chutianga tih loh kum te chu awm bawk mah se hunpui a lo thlen chuan kan tih tawh thin leh kan nunhlui te kan han dawn kir a. Chutih hunah chuan khua a har zual tain lunglen a thawk na bik thin.
Krismas hi hlim leh lawmna hun a nih lai vekin Krismas lo thlen a mahni kawppuite thlan tlawh a, thlanlung ngheng a tap ta kauh kauh hmuh tur an awm chawk a. Nunhlui chul tawh hnu, engtikah mah inher chhuak leh tawh ngai lo tur hriatreng loh theih si loh, ngaih ban theih miah loh tur min thlentu pakhat chu he Krismas hi a ni ve ngei ang. He kan khualzinna ramah hian thil chi tam tak kan tawng a, kan hrehawm lai ber ber te hi kan ngaih nasat ber ber a ni thei a, chutih laiin thihna meuh hi chuan engkim mai hi a chawk chhiain reh thei lovin kan thinlungah ser a siam thin. Chu ser tithualtu leh kan hliam a chingal min leihtu pakhat chu he Krismas hi a ni.
Sakhuana lam atanga thlir chuan he Krismas hi lawmna vawrtawp a ni kan ti thei a. Kan sual zawng zawng min tlantu tur lo pianna hun a ni a. Lawm tur kan ni. Krismas avang hian ringtu chu a lawm tur a ni a, Krismas hi lawm tak leh phur takin a hmuak tur a ni. Heti a nih avang hian mi tam tak chuan Chhandamtu lo piang lawm nan leh an lawmna entir nan midang tan thil tha an ti chawk thin. Lal Isua, amah ring apiang chhandama awm tur lo piang lawm nan chuan mi tam takin an mihringpuite tan thil tha an tiin midang lawmna tur an ngaihtuah a. Midangte tana thil tha tihna remchangah he hun hi mi tam takin an hmang thin. Fakna hla chi hrang hrang hmangin he Krismas hi ram tinah lawm a ni a, Lal Isua ringtu, Kristian zawng zawng chuan he hun hi lawmna hun leh ni serh pawimawh takah an dah lo thei lo.
Krismas lo thlen hian mi tam tak chu an sahawk a, a chhehvel boruakah nawmsip bawlna chi hrang hrang an ngaihtuah a. Thenkhatin naupang lawm zawng an ngaihtuah a, thenkhatin anmahni lawm zawng an ngaihtuah a, vanduaithlak takin mi thenkhat chuan he Krismas hi kumkhaw chawr loh phah nan te pawh an hmang tih kan hria. Urlawk zan atanga mahni thianghlimna hloh nula, urlawk zan atanga ruihhlo bawih a tang tan ta chiah te, urlawk zan atanga taksa piangsual ta te he khawvelah hian an tam ngawt ang.
Chutih lai chuan Krismas avanga mahni nun a duhthusam lo lai sim ta te, Krismas laia midangte tana malsawmna nih theihna tura thiam chi hrang hrang leh mahni neih hmanga midangte tana rah chhuak thin te an awm a. Kan nunah hian kan tih thindan apiang hi min hruaitu a ni mai a. Tihdan tha kan neih chuan nundan tha neitu kan ni mai a. Tih thindan engmah kan neih loh chuan mumal kan nei lo tihna a ni leh mai a. He Krismas hi tha tak leh hlawk deuh hleka hman kan tum chuan tihdan tha kan chher a ngai niin a lang.
He khawvelah hian eng zah nge kan chhek khawl tih ai chuan eng zah nge kan pek chhuah tih hi kan nun hriltu leh mi min tehna niin a lang a. Chhek khawl vak te hi rin aiin an awhawm lova, an thih ni-ah pawh rin aiin uitu leh ngaisangtu an tlem duh. Chu ai chuan pe chhuak thin leh midang tana malsawmna ni thin te hian uitu leh mittui nena thlah liamtu an ngah chawk.
Kan ngaihdan chu eng pawh ni se, dam a Krismas kan la thleng te hi lawm ila, lawmdan hi thiamin midang tan malsawmna ni thei ila a duhawm. Chhiartu zawng zawng Krismas chibai vek u le.