Chhuichian ngai khawchhak atanga bungraw lut
Khawchhak lam atanga dan lova kuhva leh bungraw hrang hrang tawlh ruk awm thin chungchangah chief minister hoa thukhawm chuan a chhui chiang tur din an rel a, heng study group te hian engtin chiah nge an chhui chian dawn tih erawh hriat mai a la ni lo thung.
Kan hriat angin khawchhak lam atangin bungrua tam tak a lo lut a, hengte hi dan lova lut a tam zawk a ni. Ngaia kan neih tawh miau avangin dan dik lova lut a ni tih pawh kan hre hlawm tawh lo a, kan tualchhung thil neih hmiah hmiah tawh mai a ni ber. Hetih lai hian kuhva ro a rawn lut leh a, kuhva chingtu tam tak an mangang a, anni an buai meuh chuan mipui kan phun a, sorkar kan ko ta chuah chuah mai a ni.
Sorkar lam hian engtin chiah nge hma a lak ang a, a zirchiangtu turte hian eng report chiah nge an pek ang tih hriat ni lo mah se, a zuzi mai ang tih a hlauhawm hle a, kuhva tawlhruk hmanga sumdawnna hi min kaiharhtu ni zawk se la, dan dik lova thiltih na na na chu hremna pek ngam ni ngei bawk teh se.
He sumdawnna thilah hian chiang taka sawi fak awm lo mah se, mi lian leh thiltithei tak tak pawh an inrawlh ngei nia sawi a ni a, chung mite chu an lo awm tak tak a nih phei chuan study group pawh hi an huaisen ngam hle a ngai ang. Chuti a nih loh chuan mipui laka hmaiphih nana sorkar in study group a din ang lek an ni mai ang tih a hlauhawm hle.
Bungraw dang hi chu eng pawh lo nise, he kuhva ro hmanga sumdawnna hi a nep lo a, hauhsakpui lah an tam hle tawh bawk. Kan rama kuhva chingtuten an tawrh nasat phah a, tih tawp a nih mai loh phei chuan kan duh loh thil hi a thlen phah ang tih hlauhawm tak a ni. Sorkar hian tihtawp dan kawng zawng vat ngei teh se.