Coronavirus variant thar, Omicron chu khawvel pumah chak takin a darh mek tih World Health Organization (WHO) chuan a sawi.
Nasa taka a hmaa mite atanga insiam danglam hi ram 77-ah a kai an awm tawh.
WHO chief Tedros Adhanom Ghebreyesus-a’n thuthar lakhawmtute a kawmnaah tuna a kai la awm lohnaa ngaihah pawh hmuh loh an awm nual a rinawm thu a sawi.
Dr Tedros-a chuan tuna he variant beih letnaa hmalakna chu a tawk zo mai rih lo niin a sawi bawk.
“Tuna chiang taka lang chu he hri hi kan ngainep tih a lang a. Omicron hian natna na tak thlen lo mah se a kai an tam miau chuan inenkawlna hmun tur lo inring lawk lote chuan nasa takin an tuar dawn tho a ni,” a ti.
Omicron variant hi November thlaa South Africa-a hmuh chhuah kha niin a kai an pung chak hle a. President Cyril Ramaphosa pawhin Covid-19 hi a kai tawh a, enkawl mek a ni.
He hri thar avang hian ram tam tak chuan South Africa leh a thenawm hnaite chu an tlawhserh a; mahse, hei hian a darh tur a dang zo lo a ni.
Thawhlehnia thuthar lakhawmtute a kawmnaah Dr Tedros chuan vaccine chu lak ngei tur a nih thu a sawi nawn leh a, ram tam tak chuan Omicron avang hian booster shot an pe mek.
Tun hnaia zirnaah chuan Pfizer/BioNTech vaccine chuan Omicron hi a ngam nep hle tih hmuh a ni a; mahse, hei hi booster dose lakin a tichak thei nia ngaih a ni.
Dr Tedros chuan booster lak hi a pawimawh hle tih sawiin Covid-19 darh zel tur danchahna a ni thei tih a sawi a; mahse, ngaih pawimawh ber tur a ni em tih erawh zawhna a la awm.
UK Prime Minister Boris Johnson-a chu a awmna party-a MP eng emaw zat an hel chungin England-a Covid dan thar a pass thei hram a. UK sorkar hian Thawhlehni atang khan ram hlauhawm zual a tih ram 11 atanga an rama luh a khap chu a hlip a, Health Secretary Sajid Javid chuan Omicron variant hi an ramah a darh nasa tawh tho va, kalpui a tul tawh lo niin a sawi.
Italy chuan emergency a puan mek chu March 31, 2022 thlengin a pawt sei a. Emergency a puan hi December-a tawp tur a ni a, Omicron avangin a pawt sei a, he emergency puannaah hian sorkarin zin leh pun khawm thunun theihna a nei dawn a ni.
Netherlands chuan primary school-te chu Krismas chawlh hun tura an ruahman hma chawlhkar khatah a khar dawn a, hei hi inkai darh zel tur dan nana a tih a ni.
Norway chuan inkhuahkhirhna dang tam tak a kalpui bakah bar leh thingpui dawrah zu hralh chhuah a khap.