auto corner
by ruata
Scooter tha leh lian, chak tha bawk si duh tan chuan scooter lei manhla tak tur a ni a. A man hi chu a to deuh hlek a. To hret mahse a man nen a inphu a, khawpui tawt kara gear thlak buai ngai lo a two wheeler chak tha tak duh tan duhthusam a ni.
Yamaha Motor India chuan tunhnaia an scooter tihchhuah Aerox 155 chu rawng chi thar Metallic Black colour scheme an tichhuak leh ta a. A hmaa lo chhuak tawh Grey Vermillion leh Racing Blue te nen a man a inang dawn a, Rs. 1,29,000 (ex-showroom, Delhi) man a ni ve tho dawn a ni. Heng bakah hian Monster Energy MotoGP Edition chu Rs. 1,30,500 (ex-showroom, Delhi) manin a lo chhuak tawh a ni.
A khawl
Aerox 155 hi India rama scooter tihchhuaha chak ber a ni mek a. He scooter chak leh mawi tak mai hian 155cc, single-cylinder, liquid-cooled khawl, VVA (variable valve actuation) technology a thuam leh SMG (smart motor generator) system nei tel a hmang a. He khawl hian CVT automatic gearbox neiin 18.4bhp power leh 14.2 Nm torque a pechhuak thei a. A chak tha vet vet viau.
A khawl hi India rama scooter chhuak mek ho nen han khaikhin ila. Aprilia 160 chhuak mek ho hian 10.8 bhp bawr vel power a pechhuak thei a. Suzuki Access hian 125cc khawl hmangin 8.6bhp pechhuakin Honda Activa 125 hian 8.1 bhp bawr vel a pechhuak thei bawk.
Aerox 155 khawl hian 150cc bike tha ho a rawn el pha daih ang a ni a. Transmission leh scooter a nihnaah erawh bike te nen chuan khaikhin lutuk theih a ni dawn lo thung a. Engpawh ni se, scooter tha tak leh chak tha tak chu a ni hrim hrim a. A rawng chi thar a chhuah rual hian kan han enchiang pah ni se a tha ang e.
A ruangam
Yamaha Aerox 155 hain underbone design design an tih chu neiin scooter pangngaia step-through construction, flat floorboard nei, kan hmuh tlangpui ang hi a ni ve lo deuh a. Suspension lamah pawh a hmalamah telescopic fork leh a hnung lamah twin shock absorber a nei a. Braking system lamah chuan a hmalamah 230mm disc leh a hnunglamah 130mm drum brake a nei a, single-channel ABS (anti-lock braking system) a nei tel bawk a ni. Kan lo tarlan tawh thin angin he scooter hi scooter lian chi, maxi-scooter huanga mi a ni a. Aerox 155 hian a ke hnung leh hmaah pawh 14-inch wheel a hmang a ni.
A kentel zingah hian LED headlamps leh taillamp, stop/start feature, 5.8-inch digital instrument cluster, USB charging sockets leh Bluetooth connectivity te a tel a. Kg 126 vela rit niin a hnuaia bungraw dahna 24.5-litre vela lian a nei bawk a ni.
Scooter tha leh lian, chak tha bawk si duh tan chuan scooter lei manhla tak tur a ni a. A man hi chu a to deuh hlek a. To hret mahse a man nen a inphu viau thung a, khawpui tawt kara gear thlak buai ngai lo a two wheeler chak tha tak duh tan duhthusam a ni a. Hei bakah zin veivah zeuh zeuh duhte tan pawh duhthusam a ni lehzual awm e.
Yamaha hmalakna hnaivai
Tunhnaiah Yamaha hian R15S V3 chu Rs 1,57,600 (ex-showroom) manin an tlangzarh a. He bike hian unibody seat neiin a dang zawng – design leh kentel hrang hrangte chu R15 chhuak mek dangho nen a inang thung a ni.
He bike hi Racing Blue colour scheme in an tichhuak bawk a. 155cc, liquid-cooled 4V khawl, 18.34bhp power leh 14.1Nm torque pechhuak thei a hmang a, 6-speed gearbox a nei bawk a ni.
A power leh torque pekchhuah hi Yamaha Aerox 155 nen khian han khaikhin chhin mai mai teh u! Scooter a nihnaah erawh performance leh thildangah a inang chiah chiah thei dawn lo thung a ni.