Lirthei tlan dan hi ngaihtuah that a ngai khawp mai
Sorkar in lirthei dahna tur leh traffic jam nasa lutuk sutkianna chikhat atana a siam Parking House Support Scheme (PAHOSS) te hlawhtling chhoin, hman chhoh mek nimahse, lirthei erawh a ni telin a tam telh telh mai emawni tih tur a la ni a, kawng chhawng kan la nei mai lo a nih phei chuan lirthei tlan dan hi chu ennawn leh deuh a tha viauin a rinawm.
Hunpui boruak kan hmachhawn a, mitin kan zalen chho tan bawk nen, lirthei nei nazawngin hawl chhuah phet kan tum tawh bawk si. Kan kawngpui erawh a la ngai reng a, zauh theih a ni lo a, kawng chhawnga tlanna tur a la awm bawk si lo nen, tlan loh ni bikte han siam ve thin mah ila, a la fuh tak tak chuang lo niin a lang a ni.
Hri len lai, lockdown min puan hnan dum dum lai kha chuan phalna nei chiah chhuah theih a ni bawk a, kan kawngpui pawh a ralmuang fu. Mahse, hri leng a la reh lo chung leh, fimkhur tura kan inchah lawm lawm chung hian lirthei chhuak erawh kan tam chho leh ta viau a, kan fimkhur seng tawh lo ni berin a hriat. Heti lam kawngah hian dan leh thupek kengkawhtute an chet chak deuh a tul viau tawh a ni. An lo indaih lo deuh a nih pawhin hunpui kan hmachhawn leh hman chhung rei lote tal hi chu midang pawtkhawm mai se, tun ang luih luiha lirthei kan tlan reng a nih hi chuan a fuh rei lo viauin a rinawm.
Tlan loh nia phalna nei lem lo tlanchhuakte pawh hi en uluk an ngai chho viau. Tin, tlan loh ni te hi siam tam mai se la, motor lian lam tlan theihna chin talte hi siamrem se. Tun hun chho bikte hi kan fimkhur zual ngaih hun chu a ni dawn lo’m ni? Sorkar hian ruahmanna a siam zung zung thuai lo a nih chuan kan puh hmasak leh sawisel nasat an ni leh dawn a nia.