Industry neituten sorkarah an hmuna kawlphetha pawh luhna man to thlen


Mizoram Industry Owners’ Association (MIOA) chuan Mizoramah industry din a nih dawnin kawlphetha an hman tur pawh luhna man a to lutuk avanga an harsatna tawhte sorkarah thlen an rel.
December 15, 2021 tlaia Zuangtui Industrial Estate-a factory intlawhtawnna leh hruaitu thar thlanna hun an neihah industry neitu kalkhawm te chuan, Mizoramah industry din a nih dawnin power connection man to lutuk hi industry dintute tana harsatna lian tak siamtu a nih avangin, awlsam zawka power connection neih theih dan tur ngaihtuahpui turin Mizoram sorkarah thlen nise tiin an rel a ni.
Kum 2020-2021 chhunga sorkarin state insensitive subsidy cheng vbc khat chuang lai tanpuina a pek avangin industry neitute chuan sorkar chungah lawmthu an sawi a. Kumin chhungin MIOA-in Covid-19 dona kawnga thawktute leh ramri vengtu Mizoram police te hnenah tui thianghlim in tur bottle nuai khat chuang an pawl sum sensoa an sem chhuak thei chu lawmawm an tih thu an sawi bawk.
Zuangtui Industrial Estate-a factory intlawh tawnna hun hmanah hian kum 2022-2023 chhunga hruaitu thar tur thlanna an nei nghal a. President-ah F. Rodingliana, FK Tui Um; Vice President atan David Lalmuanpuia, F Hrangvela Industry; General Secretary-ah Lalhriatpuia, Tuma Swan; Assistant Secretary-ah Andrew Lalawmpuia, Double SS Industry; Treasurer-ah Zomawii Khiangte, Zodin Plastic leh Finance Secretary-ah Lalhnuni, Gass Industry te an thlang a ni.
MIOA hian factory intlawh tawnna an nei thin a, nikum khan Luangmual Industrial Complex tlawhin, kuminah Zuangtui an tlawh ve thung a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427