Chakma Autonomous District Council-a BJP hruaitute chuan nimin khan Executive Secretary Pronit Bikash Chakma chu a chamber-ah hmuin, hna ruak chi hrang hrang hnawh khahna tura CADC sorkar hmalakna rang taka tihtawp an phut thu an thlen.
Ziak leh tawngkaa an thu thlenah CADC BJP hruaitute chuan Group B chin hnuai lama non-gazetted hna chi hrang hrang 54 ruak mek hnawh khahna tura a ruka exam buatsaih tumah CADC sorkar an puh a, hna ruak hnawh khah tur a nih thu mipui hnenah puanzar hmasak a ni lo nia sawiin, December 13-a social media lama a put darh hnuah mipuiten hemi chungchang hi an hre ve chiah niin an sawi.
Rashik Mohan Chakma kaihhruai CADC sorkar thiltih chu mi thiam leh rawih tlak zawkte aia chhung leh khatte duhsak tumnaah puhin, hmalakna tawpsan nghal an phut tih an sawi a, hei bakah hian tun dinhmunah CADC sorkar chu leiba Rs. vaibelchhe 28 nei mekah puhin, hna ruak hnawh khat thei dinhmunah a ding rih lo niin an sawi.
CADC BJP hruaitute chuan CADC ES hnena an thehluh copy hi Mizoram larsap bakah, DC&MA secretary leh Lawngtlai bawrhsap hnenah an thehlut bawk.