- rapper hausa ber pahnihna luangchhuak
Midangte tan malsawmna ni chhunzawm zel turin rapper Kanye West chuan a chenna leh a enkawl In zawng zawng chu Kohhrante tan a hlan fai vek, tih a sawi.
Culture magazine 032c in a kawmnaah, ‘DONDA’ rapper hian society-in hmasawna lehzual a ngaih thu te tarlangin, “Capitalist ho awhbehna hnuaiah kan awm a, chu chuan min tikhawbaw vek. Tun hi danglamna kan siam a ngaih hun chu a ni.
Inhlanna duhawm
“Kum reilote chhung hian In leh lo nei lo dinhmun-ah ka ding thei a, ka In te hi kohhran kutah ka dah vek ang a, In leh lo neilote tlukluhna hmun, tute pawh an len theihna in tur kan chei dawn a ni,” a ti.
Ye (Kanye hming thar) thil tum leh ruahmanna hian America rama In leh lo nei lo maktaduai tam takte tan chanchin lawmawm tak a tling dawn a, a tihllawhtling thei ngat a nih chuan a larna leh ropuina a zual zel dawn tih a chiang awm e.
In leh lo hi kohhran te kutah a hlan dawn a ni mai lova, ei leh in te pawh a mamawh apiang pe thei tura buatsaih a tum bawk.
Nikum November thlaa US inthlanpui campaign-ah khan chenna In nei lo te leh riltamte tana mamawh chhanna a nih tur thu uar takin a lo tlangaupui tawh a, “Riltamna hi kan umbo ang. Tunah hian parking-ah mi tam takin mutmu an tuah mek a ni,” a ti.
Vote 50,000 a hmu
Inthlanpui ah khan vote 50,000 vel a hmu tling tho a, Tennessee lamin an vote nghek a ni deuh ber.
Candidate ni tura a invawrhchhuah khan mi tam takin thutak hla takah an ngaihsak lem lova, a fiamthu nge, American mipui bawl phuan a tum mai mai zawk, tih ringawtah pawh inhnialna a chawkchhuak.
“Pathian ring chungin America thutiam hi kan hrethar tur a ni a, kan hmathlir te zaikhatah luan tirin, kan hmalam hun tur i din thar leh ang u. United States president ni turin ka invawrhchhuak dawn e” tiin campaign khuh hawnna a nei thut mai kha a ni a, rimawi khawvel a barkhaih.
Rapper hausa ber pahnih-na, Mahse lungawi lo
Nikum hmasa atanga Jay-Z hnuaia awm deuh ngat ngat hian tun atanga rei vak lovah ‘ber’ nihna a chang lovang, tih a sawi theih ta lo. A enkawl Yeezy leh Gap thawhhona hian $Mtd 970 vel huilut thei tura ngaih a ni a, ‘change’ a thleng thut thei.
Nikum hmasa April khan Forbes-in a hausakna $billion 1 vel nia a puanzar laiin, Kanye erawh chuan $3.3 billion niin, a tang huai hle.
Financial magazine lianin 2019 kuma billionaire a ti duh lo lek phei kha chu a la na viau nia sawi a ni.
Billionaire a nihna leh a nih dan mumal tak sawi tur nei lova, paper work nei \ha tawk lova ngaih a nih avangin Forbes-in kumtin billionaire list a tihchhuah ah a hmaih ziah a, tunah Forbes-in billionaire huangah a seng lut ta rup mai.
Heti chung hian Kanye a lawm chuang lo. A hausakna leh hlutna dik tak tarlang zo lovah Forbes a puh ngar ngar. A lungawi thei lo.