Lakhimpur Kheri-a buaina chhuak, mi pariatin an thih phahna avangin eptute chuan Union Minister of State for Home Affairs Ajay Mishra ‘Teni’ chu bâng tura nawr chhunzawmin parliament rorel inkhawm pawh a kal mumal thei lo.
Eptu party hrang hrangte hian October 3-a tharum thawhna a thlen hnu atang khan Mishra hi bâng turin an lo nawr tawh a. Tun hnaiah a chhuitu, Special Investigation Team (SIT)-in court-a an thil chhuina report an thehluhah ‘ruahman lawk’ tia an tar lan zui leh avangin an nawrna thawm hi a na zual
Ram rorelna in pahnih, Lok Sabha leh Rajya Sabha inkhawm pawh eptuten bâng tura minister an nawrna avanga a kal mumal theih loh avangin chawhnu dar 2:00 thleng tihtawp lailawk a ni.
Lok Sabha inkhawma thu a sawinaah Congress hruaitu, Rahul Gandhi chuan thil thleng kha ‘tualthahna’ tiin a sawi a, “Kha thil thleng chungchang sawi kha min phalsak ngei tur a ni. Lo neitute thattu minister hi a bâng tur a ni a, hrem ngei bawk tur a ni,” a ti.
Rajya Sabha-ah pawh Opposition Leader Mallikarjun Kharge chuan sawiho a phut bawk a. “Lakhimpur Kheri-a thil thleng chungchangah khan Rajya Sabha-ah hian Rule 267 hmangin hriattirna pek kan ni a. Kha thil thleng kha sawiho kan duh a, a bikin SIT-in lo neitute kha ruahman lawk ang taka sut hlum an ni tih chiang taka a tar lan, inphiarna leh tualthahna a awm a tih kha sawi kan duh,” a ti.
Rorelna in pawn lamah pawh eptu party MP hrem (suspend)-te chu Gandhi lim bulah pung khawmin MoS Home hi bâng tura an phutna an tilang.
Tar lan fo tawh thin angin October 3 khan Lakhimpur Kheri district, Uttar Pradesh-ah lo neituten farm law duh loh lantira kawng an zawh chu an hnung lam atangin SUV-a sut an ni a, lo neitu pali leh chanchinbumi pakhat an thi.
He thil thleng avanga lungawi lo lo neitute chuan a sutu lirtheiah hian Union Minister Mishra fapa, Ashish a chuang niin an sawi a. An pafa hian an pha ve ve thung.
Thil thleng chhui a nih hnuah police chuan mi 13 an man a, an zingah hian minister fapa pawh hi a tel.
Nilaini khan high court judge chawl tawhte kaihhruaia chhutu, SIT chuan kha thil kha ‘ruahman lawka tih’ niin an sawi a ni.
Hetiang a nih mek lai hian Nilaini khan minister hian Uttar Pradesh-ah vek hian hun a hmanna a fapa leh an thubuai chungchang zawttu chanchinbumi pakhat chu nasa takin a tilet a, tawngkam mawi lo pawh a hmang tih video thehdarhah a lang zui a. Hei hian titi pawh a siam thar phah hle bawk.
Eptuten bâng tur emaw, bân tura an nawr mek lai hian BJP chuan an tum lo niin a lang a, ‘fapa chet dan avanga pain a tawrh tur thu a awm lo’ tih chu NDTV-in party atanga an thudawn a nih thu an tar lang.
NDTV-in BJP hruaitu lawkte hnen atanga thu a dawnah Mishra hi tunah rih chuan bân tumna a awm lo niin a lang.
Union minister leh BJP hruaitu lawkte chuan Lakhimpur Kheri-a thil thleng hi court-a ngaihtuah lai niin SIT pawhin an chhuina report kimchang (final) an la thehlut lo va, hei vang hian tuna minister laka hma lo lak chu tih an tum lo.
Hetih lai hian Thawhlehnia chanchinbumi laka Mishra chet dan erawh ‘dik lo’ an ti ve tho va. Amah pawh zilhhau a ni tih an sawi.
Tar lan tawh angin Thawhlehni khan Lakhimpur Kheri-ah hian Mishra chuan oxygen plant a hawng a. Hetah hian chanchinbumi pakhatin a fapa an puhna chungchang a lo zawt chu thinrim takin, tawngkam pawh mawi lo tak nen a chhang let a ni.
Nilainia parliament rorel pawh he thubuai sawiho phutna avanga a kal pangngai theih loh hnuah NDTV chuan Parliamentary Affairs Minister Pralhad Joshi chu hemi chungchang hi a zawt a, ani pawhin thubuai hi court-a ngaihtuah lai a nih avangin sawiho an tum lo tih a sawi.