National Crime Records Bureau (NCRB) chuan nikum chhung khan chhungkaw nu 22,372 zet an intihlium niin a chhinchhiah a. Ni tin mi 61, minute 25 dan zelah pakhat intihlum ang zel an ni.
India-ah hian kum 2020 khan mi 1,53,052 intihlum chhinchhiah niin heng zinga 14.6% zet hi chhungkaw nu an ni a. Hmeichhe intihlum zahve aia tam zet an tling.
Nikum chauh a ni lo va, NCRB-in kum 2007-a ram chhunga intihlum zat a chhinchhiah atangin kum tin chhungkaw nu 20,000 chuang an intihlum ziah a. Kum 2009 kha an tam ber kum niin nu 25,092 zet an intihlum.
NCRB-in a chhinchhiah dan chuan nute intihhlum chhan tam ber hi ‘chhungkaw buaina’ leh ‘inneih lama harsatna’ a ni.
Rilru lam mi thiamte chuan India-a nute intihhlum chhan lian ber chu chhungkuaa kutthlak an tuar nasa chu a nih thu an sawi a. Tun hnaia sorkarin zirchianna a neihah pawh hmeichhe zinga 30% chuan an pasalten kut an thlak thin niin an sawi a, hei hian an nupa kar a tichhe nasa hle tih an sawi bawk.
Varanasi-a clinical psychologist Dr Usha Verma Srivastava chuan, “Hmeichhiate hian an dawhthei em em a, a tawp an thlen erawh chuan dan theih an ni lo,” tiin a sawi.
“Hmeichhe tam ber hian danin pasal neih a phal hun, kum 18 an tlinin pasal an nei a. Nupui niin mo an ni tel a, nilenga inah awmin ei an siam a, tihfai ngai an tifai a, sekrek engkim an khawih a. Heng bakah hian mo an nih angin khuahkhirhna tam tak hnuaiah an awm nghal a, zalenna an nei mang lo va, anmahni pual pawisa pawh an nei thei lo.
“An zirna leh an lo tum vete chu ngaih pawimawh a hlawh lo va, zawi zawiin chungte chu an thinlung atangin a liam a, a tawpah phei chuan rilru hrehawm takin an awm phah thin,” a ti.
Kum upa lam hmeichhiate intihhlim chhan erawh a dang deuh thin tih Dr Verma Srivastava chuan a sawi.
“An fate an lo leikang a, an khua a har a, depression an nei nasa ta thin a ni,” tiin a sawi.
A hranpaa zir chiannaah pawh Indian hmeichhia hmun thuma thena hmun khat chuan in chhungah kutthlak an tuar vek niin an hmu bawk a. NCRB erawh chuan in chhunga hetiang thleng hi a tar lang ve lo thung.