India thenawm, Myanmar ram chuan Manipur hel pawl pakhat, People’s Liberation Army (PLA)-a tel mi panga an mante chu India hnenah an hlan.
PLA hel pangate hi Bir Tikendrajit International Airport, Imphal, Manipur-ah a bika tirh chhuah Indian Air Force (IAF) thawhna hmanga phurh thlen an nih thu Ningani khan police chuan an sawi.
Helte hi Salam Somendro, Th Kalasana, Nongmaithem Narendra, Taorem Rohen leh Loitongbam Rajkumar te an ni.
PLA helho hi nikum August thla khan Myanmar-a police-ten Chindwin River Bridge-ah an man an ni.
PLA hel man hun lai hi Myanmar sipaiten India hmarchhaka helho, an ram chhunga awmte laka beihpui an thlak, Operation Sunrise hun laia mi a ni.
India-a phurh thlen an nih hnuah hian Manipur police kutah hlan niin an ni hian chhui zui ngaite pawh an chhui zui dawn a ni.