MNF party-in Chief Minister Zoramthanga kaihhruaina hnuaiah danin a kawng a zawh dik zel nia sawiin, lawmawm an tih thu an sawi.
MNF party chuan CT Lalthansanga’n Sports Minister Robert Romawia Royte leh a hoten December 10, 2021 tlaia zanriah an kilho lai thlalak chu thehdarhin, zu nena chaw ei anga puhin social media-ah dawtin a puh niin an sawi a. Cyber crime police-te chu minister leh a hote dawta puhtu an man avanga chhuanawm an tih thu thuchhuah siamin an tar lang.
“Dan bawhchhetu police-in an man avanga mipuite kan lawm em em laiin, ‘kan party mi a nia’ tih avang hrim hrim nge, Congress party-in police-te demna atana an hmang hi a zia lovin an party mumal tawh lohzia a lang chiang hleah kan ngai,” MNF thuchhuah chuan a ti a. “Dan bawhchhetuin minister PS H Zothansanga, Chhinga Veng laka FIR awmze nei lo a thehluh ve avanga minister PS chu man tura Congress party-in an phut phei hi chu an timak takzet a ni,” an ti.
MNF chuan Congress party-in kohhran pawi an lo sawi fo tawh nia sawiin, “Coconut sawhkeha chal hnawih senin, kohhran duh loh em em zu an zuar a, tunah minister leh MLA pahnihte mai ni lo, Presbyterian Kohhran Upa pathum leh rawngbawltute, evengelist pension-te ina zu nena chaw eiah an puha, kohhran upa tihsual nei lo thlengin police man an phut leh ta hi MNF chuan a ngaithiam lo takzet a, Congress-in kohhrana rawngbawltu pawimawhte bawk an bei leh ta mai hi pawi kan ti,” an ti bawk.
“Social media-a post sual palh pawh ni lo, minister tihhmingchhiat tuma post sual luih hi MNF chuan a dem takzet a, dan anga hrem ngei kan phut,” an ti a. “Kan chief minister, minister, MLA leh kan hotute hi dawta puh tawh lo turin political party tin leh social media khawih thinte kan ngen a, tun hnuah hetiang thil hi a thleng nawn leh a nih chuan MNF chuan a enliam mai mai dawn lo,” an ti bawk a ni.