Aizawl Bawrhsap Pisapui kâng, chhui tur din dawn


Aizawl Bawrhsap Pisapui chu nimin zing dar 3:15 vel khan nasa takin a kang a, branch pawimawh zawng zawng deuhthaw chu bungrua chuh hman lovin a kan chhan chhui chiang turin magisterial inquiry din a ni dawn.
Sorkar thuchhuah tar lan danin, zing dar 3:15 velah Election Branch atangin kangmei a chhuak tih hriat a ni a, zing dar 4:10-ah Fire & Emergency Services-te hriattir a nih hnuah kang thelh hna an thawk a, kangmei hi a nasat tawh avangin branch pawimawh zawng zawng deuhthaw chu bungrua chuh hman lohin a kang ral a ni.
Kangmei chhuakah hian garage-a pool vehicle an dahte pawh kang chhiain, kang chhe zingah hian Election Branch, Planning Branch, Arms Branch, ILP Branch, Census Branch, Establishment, Nazir, DC office chamber, Addl DC office chamber pahnih leh SDO (Sadar) office chamber te a tel a, Strong Room erawh kang chhe zingah a tel lo.
Kangmei chhuahna hmun tlawhtu Disaster Management & Rehabilitation Minister Lalchamliana chuan a kan chhan chhui turin magisterial inquiry din a nih tur thu a sawi a, bawrhsap pisa chu hna pawimawh tak tak khawihtu an nih avangin rang taka an lo insuan luh lailawk dan tur an ngaihtuah thute, Khatla-a Old MLA Hostel chu Bawrhsap Pisa atan luah rih a ni dawn tih a sawi.
Deputy Chief Minister Tawnluia leh a thawpui minister dang pahnih, Lalchhandama Ralte leh Dr. K Beichhua te pawhin Aizawl Bawrhsap Pisapui hi nimin zing khan an tlawh nghal a, he hmun a tlawh hnu hian Tawnluia chuan a thawhpui minister dangte chu Aizawl DC Office kan chungchangah a office chamber-ah meeting a neihpui a, meeting-ah hian Aizawl DC Office mipuiin an dawr leh vat theih nana sorkar ruahmanna siamte an sawiho a ni.
Bawrhsap Pisapui kang hian MHIP General Headquarters Office pawh a kang kai tel a, bungraw chi hrang hrang cheng Rs. 2,20,150 man hu a kang ral.
MHIP President T Lalthangpuii chuan MHIP building chu a sakna a rei tawh avangin a derthawng sa tih leh tuna an building thenkhat kang hian a ti derthawng leh zual tih The Zozam Times a hrilh a, kangmei chhuak chungchang chhui chianga hma laksak turin Aizawl Police station-ah FIR an thehlut tih a sawi bawk.
He kangmei chhuak hian Aizawl Press Club pawh tlem kangkai hmanin, conference hall-a sound mixer, thutthleng leh parda a kang chhia a, chhiatna lian tham a thlen hmain thelh mih a ni.
Tuikual South khawtlang chuan an veng huam chhunga awm, DC office kang chu pawi an tih thu sawiin, bungraw senghawi leh a tul ang anga puihbawm an inhuam thu an a sawi bawk.
PC party-in Aizawl nimin zing lama Aizawl Bawrhsap Pisapui kang chu pawi an tih thu leh kangmei tuartu zawng zawng an tawrhpui thu thuchhuah siamin an tar lang a. Kangmei chhuah chhan chhui chiang tura hmalakna awm nghal avanga lawmawm an tih thu an sawi.
“He kangmei hian kan ram leh hnam tana document pawimawh tam tak a kang ral ngei dawn a. Kan hnam tan a vanduaithlak takzet a ni,” PC party chuan an ti a. Aizawl bawrhsap pisapuia kangmei chhuak fovin mi tam tak ngaih a ti tha lo nia sawiin, rinhlelhna leh inhnialna nasa tak a thlen thin thu leh chhui chiang tura ruahmanna awm chu tha an tih thu an sawi.
PC party chuan, “Aizawl Bawrhsap Pisapui kang thelh tura Fire department-in darkar khat chhung pawha hma an la mumal hman lo ringawt te, bawrhsap pisa leh a chhehvela duty ten an mawhphurhna an ken zawh tawk loh chungchangah te a rang thei ang bera hmalakna chiangkuang tak nei turin sorkar kan ngen,” an ti bawk.
ZPM party thalai pawhin, “Kum 130 chuang upa Mizote rohlu, Aizawl Bawrhsâp Pisa kâng leh a chhûnga document pawimawih tak tak te leh bungraw hlu tak tak a kâng chhia hi pawi kan tiin, uiawm kan ti hle,” an ti a. Kangmei chhuah chhan chhui chiang tura sorkarin hma a lak nghak avanga lawmawm an tih thu an sawi.
“Bawrhsâp pisa hian tun hma pawhin kângmei a lo tuar tawh a, mitkhap kâr leka Mizote rohlu zinga pakhat meivâpa a chang ta mai hi kan ngai thutak hle,” tiin, ZPM thalai chuan “Hrem ngai an awm chuan an phu tawk hremna pek an nih theihna tura magisterial inquiry thuam chaka, dik taka hma la tur leh hetiang thil duhawm lo hi a thlen nawn tawhlohna tura fîmkhurna kawnga nasa zawka hma la tûrin Mizoram sorkâr kan ngen,” an ti bawk a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427