Mizoram Youth Commission (MYC) Chairman Dr Vanlaltanpuia’n ‘IAS Hybrid Coaching Scholarship Exam’ result nimin khan a puang. He programme atan hian mi 100 thlan chhuah an ni.
December 11, 2021 khan Mizo thalaiten tual chhunga IAS coaching man man zawka an kal theihna turin centre pali – Aizawl, Kolasib, Lunglei leh Siaha-ah exam buatsaih a ni a. Heta tang hian a thiam thiam thlan chhuah niin, Aizawl atangin mi 60, Lunglei 20, Kolasib leh Siaha atangin mi 10 ve ve, an vaiin mi 100 thlan chhuah a ni.
He exam hi Aizawl atangin mi 192, Lunglei atangin mi 34, Kolasib-ah mi 12 leh Siaha-ah mi 25 an vaiin mi 263-ten an hmachhawn a ni.
MYC-in centre pali atanga mi 100 tan ‘IAS Hybrid Coaching Scholarship Exam’ a buatsaih chu December 15, 2021 khan New Delhi-ah mi thiam bikten an endik hnuah exam result hi MYC Conference Hall-ah Chairman Dr Vanlaltanpuia’n a puang chhuakin, an thlan chhuahte chu an centre-ah theuh zirtirna pek an nih tur thu leh centre thutchilhtu tur pawh dah an nih tur thu a sawi.
Result puannaah MYC Chairman chuan IAS coaching hi offline leh online-a kalpui a nih avangin ‘hybrid’ tia hming phuah a nih thu a sawi a. Exam result hi mi thiam te’n uluk taka an endik thu leh, politics rawngkai pakhatmah a awm loh thu leh duhsak bik pawh nei loa, a thiam leh tling te chauh lak an nih thu a sawi bawk.
The Zozam Times zawhna chhangin, IAS coaching kal tura thlan chhuahte hi coaching kalna tur hi Delhi-a IAS coaching academy pahnih ALS leh Chanakya-te thlan a nih thu Dr Vanlaltanpuia hian a sawi a. “Kan duh ang huna coaching an kal theihna turin kawng kan dap nasa a. Kan duh hun (Jan-Feb)-ah te coaching centre dang an remchan loh avang te, hostel nei tel lo te an nih nawk bakah ALS leh Chanakya chiahin accomidation min pe thei a ni,” a ti.
Coaching kal hun chhung zawng zawnga an sum senso tur hi Mizoram sorkarin a tumsak tur thu sawi bawkin, “An coaching kalna tur senso hi Mizoram sorkarin a tumsak vek dawn a. Sorkar pawisa a nih avangin dik leh fel taka hman a ngai a. Tute pawh hi langtlang takin induhsakna awm loa kalpui tur a ni ang,” MYC Chairman in a ti bawk.
Dr Vanlaltanpuia hian Mizo thalaite zingah All India Service exam hi a lar tak vak loh avangin MYC chuan thalaite sukthlek her danglam thei khawpa tanlak zel an tum thu a sawi a. “All India service hi zan khat thil thua hlawhtling nghal a har a. MYC chu Mizo thalaiten exam atana tha taka an inbuatsaih theihna tura theihtawp chhuahsaktu mai a ni. Exam beitute an mi mal dinhmun leh thiamnaah a innghat thui hle a ni,” a ti.
MYC kaltlangin ‘Super 40 Programme’ chu kum tharah kalpui leh tum a nih thu a sawi bawk.