Omicron variant chu India ram chhungah chak takin a darh mek nia hriat niin state 11-ah mi 101-in an kai tih hmuh chhuah a nih tawh thu health ministry chuan a sawi a. District 19 phei chu a darh mai theihna dinhmunah a ding mek.
Covid-19 thawh thumna a lo thlen mai theih avangin ministry chuan mipuite chu Covid-19 kai lohna tura invenna – hmai tuam leh mi dang hlata awm kalpui tha turin a ngen a. Tul lem lova zin chhuah leh mi pun khawm tamnaa tel loh hram dan dap turin a ti bawk.
Ministry chuan UK-a a darh chak dan thlirin inven that a ngai hle tih a sawi a. UK-ah hian Omicron kai hi mi chuang an awm tawh a ni.
Ram khawpui ber, Delhi-ah chuan Zirtawpni chawhma khan Omicron kai mi 10 hmuh belh leh an ni a, mi 22 an tling ta.
Omicron kai mi 10 kai hmuh ni tak hi Delhi-ah chuan mi 85 zet Covid-19 kai an awm ni a ni a, a hma niah mi 57 leh mi 45 niin an pung chak leh mek.
Ram chhunga hripui tuar na ber ni sa, Maharashtra chu Omicron kai tamna ber ni leh tawhin mi 32 an tling leh tawh a. Rajasthan-ah mi 17, Karnataka leh Telangana-ah mi pariat ve ve bakah Gujarat, Kerala, Tamil Nadu, Bengal leh Andhra Pradesh-ah pawh Covid-19 variant thar kai hi an awm tawh bawk.
Maharashtra-a Omicron kai hmuh zingah hian naupang pawh an tel a. Mipa naupang kum thum mi leh hmeichhe nausen thla 18 mi lek an ni.
Sorkar chuan state tinte chu fimkhur zual tur leh hri kai hmuhte chu eng hri nge an kai tih hre tura endik theuh turin a ti.
India-ah hian ram pawn lam atanga lutte kaihhruaina thar chu December 1 khan hman tan a lo ni tawh a. Ram hlauhthawnawm deuh atanga lutte chu an thlen rualin RT-PCR hmanga endik an ni a, a kai lote pawh thenkhat chu inkhung hrantir an ni.
“Omicron kai tam ber hi zin chhuahna nei emaw, zin chhuakna neite nena inhnimhnai an ni a. Mi tlem erawh hetiang nei miah lo an ni,” tiin Dr VK Paul, India-a Covid task force chief chuan a sawi.
Omicron hi thla hmasa khan South Africa-ah hmuh hmasak ber a ni a. World Health Organization (WHO) chuan ram 77-ah a kai an awm tawh thu sawiin hei aia tam hi a nih a rinawm niin a sawi.
India-a kai hmuh hmasak ber erawh Karnataka-ah niin December 2 kha a ni.