Bank union huaihawtin India rama Nationalise Bank-te sorkar laipuiin privatise tura a kalpui duh loh lantir nan bank-te an khar a, Mizoramah pawh SBI leh Nationalise Bank hrang hrangten he nawrhna hi zawmin bank an khar.
SBI Officer Association Mizoram hruaitute chuan privatisation kalpui a nih chuan foreign-in share an nei tam dawn a, a nghawng tur langsar zingah SBI hian mi hausa agreement a sign-pui nual a, privatisation a nih chuan a hausa an hausa thur thur dawn a, mi rethei leh harsa zawk tan bank hi a tangkai nep deuh dawn tihna a nih thu an sawi.
Banking Law Amendment bill hi pass a nih chuan public sector bank hi hralh a pawisa hmuh thut kha sorkar laipuiin a tum niin an ngai a, a hnu leh lam an ngaihtuah lo nia hriain, India ram tana tha ber tur niin a lang lo a, ram pawnah hlawkna a lut ber dawn tih an sawi.
Nawrh zawmtute hi Mizoramah Branch 60 vel awmin hnathawktu mi 400 vel an awm a ni.