National Health Mission (NHM), Mizoram hnuaia thawktu special doctor atanga IV Grade inkar mi 2,000 chuangte chuan Mizoram sorkara thil phut an neih vanga lungawi lohna lantir nan nimin hna an thawk lo.
National Health Mission Employees Union (NEUM) hruaitute chuan sorkara an thil phut hrang hrang chungchangah chhanna an hmuh loh avangin an member-te chuan lungawi lohna lantirin an hnathawhna hmunah an kal lo tih The Zozam Times an hrilh a, mi 2,200 niin, Mizoram chhunga sorkar enkawl damdawi in hrang hranga thawkte an ni.
Nawrh an huaihawt chungchangah hian NEUM hruaitute chuan sorkar hotute nen indawrna an la nei lo tih an sawi a, sorkar hotute nen indawrna chu neih ngei an duh a, inbiakna pawh an la neih ngei an beisei tih an sawi.
Damdawi ina thawktu mi 2,000 chuang an kal loh avang hian harsatnate pawh a awm an ring a, mipui harsatna siam chu duh lo hle mah se sorkarin a enkawl danah an lungawi lo em avangin an nuar ta tih an sawi a ni.
NHM-a thawktute chuan a ngheta dah a nih theih nan cabinet meeting-a ngaihtuah turin Mizoram sorkar an phut tih an lo puang tawh a, sorkara an hnathawh ang mil post ruak a awm lo a nih pawhin sorkarin post ruak a neih sa hmanga siam rem turin sorkar an phut.
NHM hnuaia thawktute chu a tam thei ang ber hnawh khat turte, NHM hnuaia contract-a thawkte chuan hun lo kal zel turah a hun taka hlawh an lak zel theih nan, health ministry financial guideline awm sa angin finance departmentte December 15 ral hmaa department hnenah pe chhuak thin turin sorkar an phut a ni.
Sorkara an thil phut hrang hrangte chu chhanna chu tun thla ni 15 thleng an ngaichang a, thu lawmawm an hmuh loh avangin nawrh an huaihawt ta a ni.