BJP Mizoram Pradesh-in nimin khan an pisa, Atal Bhawan, Aizawlah Advance Christmas & Good Governance Day pualin hun an hmang a. BJP Mizoram President Vanlalhmuaka’n thu sawiin, Myanmar ram buai avanga Mizorama raltlante tan sorkar laipuiin tanpuina a ruahman mek niin a sawi.
Vanlalhmuaka chuan Mizorama rel kawng siam hna thawh mek muang lutuk chungchangah pawh hmalak mek a nih thu a sawi bawk.
Tun hnaia sorkar laipui dawra Delhi a kal chungchang sawiin Vanlalhmuaka chuan, “Mizoram sorkar hian central-a an zin hian thil tak tak hi an zuk sawipui lo nge, union minister ka kawm atangin Mizoram mamawh leh harsatnate awmze neiin an thlen lo niin a lang,” a ti a. Aviation Minister Jyotiraditya Scindia phei chuan Mizoram chief minister hnenah ziaka rawtna thlen turin a chah hial niin a sawi.
BJP Mizoram president chuan, “Kan sorkar hrawn mek hian central an dawr hian awmze neiin dawr sela, press conference-a thil awihawm taka sawi ringawt lovin, a tak taka ram hmasawnna ngaihtuah zawk tur leh a lang maia central dawr satliah ringawt lo turin ka ngen duh a ni,” a ti bawk.
Vanlalhmuaka chuan BJP senior member mi pangate chawimawina leh Christmas thilpek atan Shawl a pe a. Atal Bhawan pawh kumin atan an khar rih tawh dawn bawk a ni.