India rama Sikh sakhaw hmunpui ber, Punjab-ah chuan darkar 24 lek chhungin an sakhaw thil tihbawrhbanna ni ngeia an ngaih vawi hnih thlengin a titute hi mipuiin an sawisa hlum ve ve.
Heng thil hi Inrinni tlaia Amritsar-a Golden Temple-ah leh Pathianni zinga Kapurthala district, Nijampur khuaa gurdwara-a thleng a ni.
Nijampur khaw mite hian Pathianni zing dar 4:00 vel khan gurdwara-ah mi pakhat an man a. An mi man hian Sikh puanzar (flag), Nishan Sahib an tih chu zah lo takin a ti niin an sawi.
Police-in a hmun an thlenin an la nghal a; mahse, Sikh mite hian an awm lai ngeia thu zawh an phut a. Police nen hian innawr zuiin an sawisa ta a ni.
Cellphone hmanga video an lakah chuan tiangin an vua tih a lang a. Police-in damdawi in an thlenpui chuan a thi tih puan zui a ni.
Inrinni tlaia Amritsar-a thil thleng, closed circuit television-in thla a lakah chuan mipa kum 20 awh hmel pu, a lua puan eng khum chu Sikh sakhaw lehkhabu thianghlim, Guru Granth Sahib an dahna hmun an hungna chu a zuan khum a. Sakhaw thil hlu tho, golden sword an dah chu lain puithiam leh vengtuten an man bet ta a ni.
A thiltih tum danga an man beh hnua thil thleng erawh CCTV-ah hian hmuh theih a ni tawh lo va. Police-te chuan officer-te an thlen chuan a ruang an hmu tih an sawi a, thil thlen dan chhui mek a ni.
Nilaini tlai maiah pawh khan an sakhaw lehkhabu thianghlim thi, Gutka Sahib an tih chu Golden Temple bula dilah paih a ni tawh bawk.
Golden Temple hi Sikh sakhaw zuitute chuan an thlarau lam khawpui a ni a. Hetianga sakhaw thil tihbawrhbansak hi an ngai thutak hle a. Nakumah hian assembly inthlan a awm dawn bawk avangin rorel lai, Congress sorkar chu tun hnaia hetiang a thleng reng hi an hlawhchhamnaah mi tam takin an ngaihsak.
Eptu, Akali Dal MP Balwinder Bhunder chuan Inrinnia thil thleng a dem thu sawiin, NDTV hnenah ‘India chem hriam ber Punjab tihchhiat tumna’ tiin a sawi.
“Kum nga liam ta chhung khan politics thil khelh nan an hmang zel a ni,” a ti.
Kum 2014 leh 2015 khan a thleng zing hle thung a, kum 2017 leh 2019-a Punjab inthlanah pawh khan sawi rik a nih nasat phah hle.