Aizawl: December 17, 2021 zinga Aizawl DC office kangmei chhuah chhan chhuichhuah a nih theih nan a rang lama hma la turin Congress party chuan an phut.
Congress party thuchhuak chuan, sapho sulhnu Aizawl bawrhsap pisapui, kum 100 chuanga upa a kangral ta mai hi pawi an tiin, vanduaithlak an tih thu an sawi a. Home Minister Lalchamliana’n Bawrhsap Pisapui kan chhan chhui chiang tura magisterial inquiry din a nih tur thu a sawi chu lawmawm an tih thu sawiin, “Kangmei chhuah chhan fel taka chhuichhuah a nih ngei theihna tura a rang lama hma la turin kan phut tlat a ni,” an ti.
Sorkar thuchhuahah zing dar 3:15 velah Election Branch atangin kangmei a chhuak tih hriat a ni a, zing dar 4:10-ah Fire & Emergency Services hriattir a ni chauh chu a makin Mizoram mipui ngaih a that loh thu leh kangmei chhuah hun leh fire service hriattir hun inkar rei lutuk avang hian thil dik lo eng emaw a awm nge nia rinna mipuite rilruah a awm lian hle niin Congress party hian an sawi.
Aizawl DC office-a document hluite digitization kalpui mek ni mah se, record leh lehkha hlui DC Archive Room-a dah zaa 95 bawr vel chauh dah that a la nih thu sorkar thuchhuaka tar lan a nih laia, mipui rilru hruai kawi tum nia ngaih theih tak turin Sports Minister Robert Romawia Royte-in document pawimawh zaa 98 vel scan hman tawh avangin kangmei leh rukru laka a him deuh vek avanga a lawmthu social media-ah a puangzar thung niin an sawi bawk.
Congress party thuchhuak chuan, “MNF sorkar pian hlima Pathian mi thenkhatin ‘MNF sorkar chu chhiatna thlentu tur a ni’ tia an lo puan tawh chu a dikzia a lang chho zel niah kan ngai,” tiin, Mizoram mipui tawrhna a nasat lutuk hma ngeia hlemhletna nasa takin a bawm mek MNF party chu Pathian malsawmna dawng tlaka insiam tha thuai tura an ngen thu an tar lang a ni.