India hmar lam hmun thenkhat – Haryana, Punjab, Rajasthan leh Himachal Pradesh te chu khaw vawt vin takin a tuam tan mek a. India Meteorological Department chuan ni hnih vel a vawt zual dawn tih Pathianni khan a sawi.
MeT office chuan khaw vawt hian Delhi, Uttar Pradesh, Madhya Pradesh, Jammu & Kashmir, Ladakh, Gilgit-Baltistan leh Muzaffarabad, Uttarakhand leh Himachal Pradesh hmun thenkhat a tuam dawn niin a sawi.
Churu, Rajasthan-ah chu khaw vawh berna niin -2.6°C a ni a. Sikar (-2.5°C) leh Amritsar (-0.5°C) a ni bawk tih IMD chuan a sawi.
Delhi khawchin thlirtu, Safdarjung Observatory chuan 4.6°C a ni tih sawiin 3°C pawh a ni thei dawn tih an sawi a. Lodhi Road-ah chuan 3.6°C a ni bawk.
Uttarakhand hmun thenkhat chu chhum chhah takin a tuam bawk.
IMD hian hmarthlang lamah hian ni thum vel a la vawt dawn a, a bak pawh a la ni thei tih a sawi.
Uttarakhand-ah hian ni hnih chhung leh Punjab leh Haryana-ah December 23 leh 24-ah chhum a zing nasa hle dawn niin an sawi.
Thawhlehni thleng hian hmarthlang lam atangin thli vawt leh ro tak, darkar khata km 15 vela chak chu hmarthlang lam phaiah a thawk dawn niin an sawi.
IMD chuan chhum chhah tak zing hian khaw hmuh theih chin a titawi dawn hle a, fimkhur pawh a ngai dawn niin an sawi lawk.
Phaizawl lamah IMD chuan khaw vawh lam chu 4°C vel a ni dawn niin an sawi a. Khawchin zirtute hian khaw vawt an tih chin hi 10°C aia vawt, 4.5°C aia vawt si lo ang hi a ni a. A aia vawt chu sawi dan dang an nei.
Khaw vawt uchuak chin chu a vawh dan tlangpuiah 6.4°C vel ang hi a ni bawk.