Netherlands chuan Krismas lo thleng mai tur chhungin Omicron coronavirus variant avangin inkharkhip khauh zawk a kalpui.
Ni tin mamawh zuar ni lo, bar, gym, sam siamna leh vantlang hmunte chu January 14 thleng khar turin a ti a. Hunpui chhungin chhungkaw khatin mikhual pahnih bak a neih theih loh bawk.
Prime Minister Mark Rutte chuan inkhuahkhirhna thar chu ‘loh theih lohva kalpui ngai’ a nih thu a sawi.
Europe khawmualpuiah hian ram tam tak chuan hri chi thar, a hmaa mite atanga nasa taka insiam danglam avang inkhuahkhirhna an kalpui thar nasa hle.
Netherlands-in inkhuahkhirhna a kalpui hi Omicron avanga la khauh ber a ni.
Inrinnia thuthar lakhawmtute a kawmnaah Rutte chuan, “Tawi tea sawi chuan Netherlands hi naktuk atangin kan inkharkhip dawn a ni,” a ti.
Inkaihhruaina tharah chuan mipuite chu a tam thei ang ber ina tawm tura tih an ni.
Inkawm khawm thei zat pawh bituk a ni a. Mi khual pahnih, chu pawh kum 13 chung lam chauh neih phal a ni a, hemi bik erawh December 24 leh 26 inkar leh Kumhlui thlah zan leh Kum thar niah mi pali-ah tihpun a ni.
Mitthi vui, kar tin bazar leh infiamna lam tih loh pun khawm phal loh a ni a. Infiamna pawh entu awm lo tur a ni.
Thingpui dawrten a dawrtu inah an pe thei ang a, ni tin mamawh zuar lote pawhin hetiang hian an ti thei ang.
Sikul zawng zawng January 9 thleng khar tur a ni bawk.
Inkharkhip puan a nih dawn avang hian Inrinni khan mipuite chu Krismas bazarah an inhnawh khawm nasa hle.
Dutch National Institute for Public Health chuan an ramah hian coronavirus kai mi maktaduai 2.9 chuang awm tawhin mi 20,000 chuangin an thihpui tawh tih an sawi.
Omicron variant tak hi Netherlands-ah hian kai an la tam lutuk lo va; mahse, a darh tan mek thung a. Kum tharah chuan mite kai tam ber hri a nih an ring.
Hri leng donaa an hotupa, Jaap van Dissel chuan inkhuahkhirh hian hun a pe dawn a, miin vaccine booster an lak hun leh damdawi in inbuatsaihna hun an neih phah dawn niin a sawi.
Netherlands-ah hian puitling 85% chuan invenna an la tawh a; mahse, 9% vel chauhvin booster hi chu an la dawng thung.
Europe khawmualpui ramte chu Omicron coronavirus variant darh zel avangin inkhuahkhirhna hrang hrang an kalpui thar mek zel.
France-ah chuan Pathianni atang khan Omicron tuar na ber ram ni rih mek, UK atanga an rama zin luh an khap ta rih a. UK-ah hian Inrinni pawh khan Omicron kai hi mi 25,000 dawn hmuh chhuah leh hman an ni bawk.
France ramah hian Omicron hi a darh chak hle a. An hruaitute pawhin ‘tek ang maia chakin’ a darh niin an sawi.
Pathianni vek zan dar 11:00 atang khan Germany pawhin British khualzin leh sumdawnna thila zinte chu an rama luh an khap tan bawk.
Europe-ah hian Covid-19 kai mi maktaduai 89 chuang awmin mi maktaduai 1.5 chuangin an thihpui tawh bawk tih EU-in a chhinchhiahnaah tar lan a ni.