Leftist candidate Gabriel Boric chu Chile ram president atan thlan niin an rama he nihna chelh thei naupang ber a ni.
Kum 35 mi chauh, sorkar dodalna lam lantirnaa an hruaitu thin hian far-right lama a elpui, José Antonio Kast chu point 10-in a hneh a ni.
Boric-a hian amah thlawktute chu mipui rorelna tha taka a enkawl dawn thu a hrilh a, Chile rama an ei bar dinhmun din thar a tiam bawk.
Tun hnaiah an ram hi intluk tlan lohna leh ei rukna avangin mipuiten thil duh lohna hrang hrang lantirnain a tibuai nasa hle a, hei hi Boric-a hian a hruai dawn ta a ni.
Boric-a’n hnehna a chan hi an khawpui, Santiago-ah chuan nasa taka lawm a ni a. Khawlaiah amah thlawltuten flag vaiin an car horn an tiri nasa hle.
Boric-a chuan a hna chu dik takin, a mawhphurhna hre renga a thawh dawn thu leh mi tlem te, ram tana hnawksakte dova a beih tur thu a sawi.
“Chona lian tak kan hmabak a. Kum lo awm turah hian kan ram hma lam hi a nghet lo hle tih kan hmu a, president ka nih chuan mipui rorelna hi ka hum ang a, thusawi aiin ka ngaithla tam ang a, inpumkhatna turin ka bei ang a, mipuite ni tin mamawh ka ngaihtuah ang,” tiin amah thlawktute hmaah a sawi.
Inthlanah hian Boric-a hian vote tla zinga 56% a hmuh laiin Kast-a hian 44% a hmu thung a. Kast-a hian vote thlak theih hun a tawp hnu darkar khat leh a chanve velah a chak lo tih a pawm a, hetih lai hian ballot zahve vel chhiar a ni tawh.
Inthlan chuhtute pahnih hian hmathlir inang lo tak neiin mipuite chu vote turin an thlem a. An pahnih hian political party pangngai, an rama ro lo rel tawhte zinga mi an ni lo ve ve.
Latin America-a ram hausa ber pakhat, Chile hi a mipuite hausakna a inthlau hle a. An rama cheng 1% vel hian an ram pum hausakna 25% vel hi an ta niin United Nations chuan a tar lang.
Boric-a chuan an rama intluk tlan lohna nasa lutuk chu mi tinin dikna chanvo an neih tizauva intlukna a awm theihna tur siam a tum a. Pension leh healthcare systems an kalpui mek chu siam that a tum a, hnathawh hun chu chawlhkar khatah darkar 45 atangin darkar 40-ah a titlem dawn a, investment lam tihpun a tum bawk.
President atana thlan thar hian tuna kalpui tum, mining project pawh kalpui a tum lo va, he thil hian khawtlang nun leh an rama khuarel tam tak a tichhia niin a sawi.
Nobel Peace Prize pawh lo dawng tawh, Suu Kyi-i hi sipai sorkar hian thubuai 10 vel zet an siamsak a, hengah hian thiam loh a chang vek a nih chuan kum 100 chuang lung ina tang thei a ni a, amah hi chuan an puhna zawng zawng hi a pha vek.
Police chuan phalna nei lovin ram dang atangin walkie-talkie paruk a la lut a, phalna nei lo bawkin a hmang a, a chenna inah an hmu chhuak tih an sawi a. Thil thlen dan en kualnaah chuan a in daptu police officer-te hian in dap phalna an nei bik lo niin a hre chiangtute chuan AFP an hrilh.
Walkie-talkie chungchanga an puhnaah hian thiam loh a chang a nih chuan kum thum lung in tang thei tur a ni.
Ei rukna chi hrang hrangah inhnamhnawiha puh a ni bawk a, hengte hi kum 15 thleng lung in tan theihna a ni hlawm a. Official secrets act bawhchhiaa puh a ni bawk.
Suu Kyi-i thlawptute erawh chuan a laka thubuai siam hi tanchhan nei lo a ni a, politics a khelh zuina tur dan tumna mai a nih thu an sawi a. Sipaiten thuneihna an chan lai ngeia tihfel an tum niin an sawi bawk.
Sipai hotute erawh chuan a chungchang hi court hranpa, judge pawh a sorkar laia ruatte ngei an thutnain a rel niin an sawi thung.