December 4-a sipaiten tihsual palh avanga civil mi an kah hlum 13 zinga 12-te awmna, Nagaland-a Oting khaw mite chuan Thawhlehni khan inkahna thlenna hmunah hian kawng an zawh.
Kawng zawhnaah hian sipaiten an thah tak chhungte pawh an tel a, an khaw thenawma mite pawhin an tawiawm bawk.
An khua atanga inkahna hmun thleng kawng an zawh hnuah hian a hmunah hian tawngtaina hun an hmang zui bawk.
Khaw mi pakhat chuan NDTV hnenah, “Khang ni liam taah te khan kan sun a, he hmunah hian kan kal thei lo va, kal pawh kan châk lo va, vawiin hian kan lo kal khawm ta a. Kohhran hruaitute pawhin an rawn tlawh a, mi thahte tan dikna hlenchhuah a nih theih nan kan tawngtai a ni,” a ti.
Oting village council member Philip Konyak pawhin civil mi thah takte tan dikna hlen chhuah a nih theih nan khaw mite chuan an bei zel dawn tih a sawi.
“Indian Army leh state sorkar chetsualna hi kan hre reng dawn a. Oting khaw mite hian dikna hlenchhuah a nih theih nan kan bei zel ang,” a ti.
Oting Village Council-in kawng zawh an huaihawt hi thil thlenna hmun, Mon district-a Konyak Naga Tribe pawl lian ber, Konyak Union pawhin an thlawp.
“Konyak pawl hrang hrangte chuan Naga politics pawl hrang hrangte chu kan huam chhunga ralthuam nena che lo turin kan ngen a. Kan boruak tichhia apiang chu Konyak hmelma an ni dawn a, an chungah eng pawh thleng se Konyak-ten mawh an phur lo vang,” an ti.