Dan kenkawh tumtute thuneitu sang atanga harsatna an tawk hi kan hre thiam lo : Sapdanga


ZPM Working President K Sapdanga chuan khawchhak atanga kuhva sumdawn dan tur sorkar laipuiin a rawn ruahman anga dan kengkawhtuten dan kenkawh an tum laia thuneitu sang zawk atanga harsatna an tawk leh thin chu an hriatthiam loh thu leh mak an tih thu a sawi.
Nimina Aizawl Press Club-a thu thar thehdarhtute kawmin K Sapdanga hian kum 2019 khan Minister of Home Affairs-in Mizoram chief secretary hnenah dan phal loha kuhva rah tawlh chungchang titawp tura rawn hriattirin, he lehkha hmang hian Champhai bawrhsapin khapna thupek a chhuah tawh thu a sawi.
K Sapdanga chuan, “Mizoram chief minister hoa khawchhak atanga dan loa sumdawnna kalpui mek tihtawp dan tur rel hnu lawkah December 14, 2021 zan atang khan Champhai atangin kuhva ro chu kawngpui pangngaiah phurh zel a nih thu chanchin tharah puan a ni a. December 16, 2021 atang phei chuan ni tin trip 30 kal phal a nih thu puan a ni zui bawk a. Dan palzut zel a nih avangin vawiinah Mizoram pum a deng chhuak a, dan pawisa loten FIR hial an thehlut ta a ni,” a ti a. Dan kengkawhtuten dan kenkawh an tum laia thuneitu sang zawk atanga harsatna an tawk leh thin hi an hriatthiam loh thu a sawi.
Mu mal leh fel fai taka border trade kalpui theih a nih reng laia dan loa sumdawnna kalpui a nih avangin chhiah awl rukna nasa tak a awm ngeia a lan thu leh, chhun ênga thil thleng mekte hian dan leh hrai kenkawh kawngah MNF sorkar hlawhchhamzia a tar lang chiang hleah ZPM chuan an ngaih thu a sawi a. “Ram pahnih insumdawn tawnna hi hlawk zawk leh awmze nei zawka dan hnuaia sumdawn a nih theihna tur leh sumdawngte an kal theihna tura hma la turin sorkar kan ngen a ni,” a ti.
Tun laia Mizoramin a buaipui kuhva sumdawnna hi sorkar hian dan angin kalpui tura an phut thu leh tuna kalpui danah dan bawhchhiatna a awm a nih chuan state sorkarin chhui chhuak ngei sela, dan bawhchhiate hi hrem rawh se tih an phut thu a sawi a. ZPM an sorkar hunah kuhva sumdawnna hi sorkar leh mipuiin awmze neia hlawkpui taka a hman theih turin dan zawm thlapin, ram dan ang thlapa kalpui an tum thu a sawi bawk.
Zawhna chhangin ZPM Working President K Sapdanga chuan, “Dan loa kuhva sumdawnnaah hian thu thang atang chuan Mizoram sorkara thuneitute an inrawlh thu a awm a. Kan official te pawhin an thup seng tawh lo a, social media lamah te kan hmu a, harsatna lo thleng zawng zawng hi thuneitu sang atanga lokal niin kan hria. Dan bawhchhiatna tipunluntu hi thuneitu sang lam niin kan ngai,” a ti.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427