Kumtawpah hian kan nun i chhuikir thar leh ang u
Kumtir atanga kan nghah kumtawp kan lo thleng leh dawn ta reng mai. Kumin chhung atana kan tihchhuah tawp berna tur a ni tawh a, kumin chhunga min hlutsakna leh min lo chhiarsak thinna zawng zawngah lawmthu kan sawi e.
Kumin chhung ringawt pawhin thil tam tak a thleng a, hri leng kara nung kan nih miau avangin nunphung thlak a ngai nasa hle bawk. Chuti chung chuan tun hun kan la thleng theite hi malsawmtu malsawmna liau liau a va ni em.
Mihring lamin tih theih engmah kan nei lo a, mi der dep mai kan ni bawk. Chuti chung chuan thawktu leh chhiartu zawng zawngte huangkhatah kan tla za a, min finchhuah chungin min kalpui reng thei zelte hi kan tan malsawmna a va ni em.
Damtein kumthar kan thleng leh turah ngai ila, kumthar hian engtin chiah nge min herpui ang a la hriat loh a, kan kal zel dan tur lah hi a bo theih haih haih khawp mai. Chung zawng zawngte hi hre ta vek ni ila, mihring kan ni lo emaw tal a ni ang!
Kan nunna chungah te hian thu kan han nei lo khawp a, kan hrisel leh bawrhsawmte hi a malsawmna vek a lo ni zawk a, malsawmtu malsawmna hi chhiar thiam a har thin hle thung. Kan damchhung kumte hi a rei lo a, hun hmang tha tura tih ni mah ila, sualna erawh chuan min chenchilh reng thung a, min chenchilh lo se mihring kan ni dawn em ni?
Engpawhnise, kan theih chin chinah kan hun hmang tha ila, sorkar leh sakhuanain a duh loh hi ti lo ila, ram nuam siamtu nih erawh i tum theuh ang u. Chutiang tur chuan inbuatsaih thei vek ila a va nuam dawn em.
Krismas leh Kumthar chibai vek ule.