World Health Organization chuan khawvel puma Omicron variant a darh mek avangin Kristiante hunpui lo thleng tura chawlh hman dan tur an ruahman hrang hrangte chu vantlang himna atan thulh turin mipuite an ngen.
WHO hotupa, Dr Tedros Adhanom Ghebreyesus chuan, “Thiltih tur thulh hi nun tihtawp ai chuan a tha zawk a ni,” a ti a. ‘Thutlukna siam harsa’ chu siam a ngai niin a sawi.
South Africa-a November-a hmuh chhuah, Omicron hi WHO chuan ‘variant ngaihven ngai’ huanga a dah a ni.
Thawhtannia thuthar lakhawmtute a kawmnaah Dr Tedros chuan tunah chuan a hmaa miin an kai tam ber, Delta aia chak fein variant thar hi a darh chak zawk tih finfiah a ni tawh tih a sawi.
WHO hian Omicron-in natna na lo zawk a thlen tia thutlukna ‘mawl tak’ siam nan finfiahna tha tawk a la awm lo tih a sawi bawk.
Dr Tedros chuan, “Hripui avang hian mi tin kan damlo va. Mi tinin kan thiante leh kan chhungte nena hun hun hmanho kan duh vek a. Kan zavaiin nun pangngaia nun leh tawh kan châk,” a ti.
Hetiang hi ni tawh mah se mi tin, hruaitu atanga a hnuahnung ber thlengin mipuite himna turin thutlukna harsa siam a ngai ta tih a sawi a. Thiltih khawm thulh emaw, sawn hlat hret emaw a ngai ta tih a sawi.
“Tuna thulha nakina lawm chu tuna lawma nakina tawrh ai chuan a tha zawk a ni,” tiin Dr Tedros chuan a sawi.
Ram tina mipui 70%-in nakum kum laihawla invenna an lak chuan hripui hi kum 2022-ah chuan a tawp theih mai theih thu WHO hotupa hian a sawi.
Dr. Tedros hian kum 2019-a hri a darh tanna nia ngaih, China pawhin a darh tan dan chhuina turah data tam zawk pek a tiam thu a sawi a. Hei hian hripui hmachhawn zel dan turah a puih theih a beisei thu a sawi.
Ram tam tak chuan Covid-19 variant thar darh mek hi danchah tumin theihtawp an chhuah a, zin chhuah pawh an khap hlawm.
United States-ah chuan Omicron hi tuna hri kai tharte kai ber a ni der tawh a. Kai thar zinga 73% zetin an kai.
President Joe Biden chuan hri darh thar leh mek chungchangah hian Thawhlehni zan (India-ah Nilaini zing)-ah thu a puan rin a ni a; mahse, White House erawh chuan ‘ram inkhar’ erawh a rinawm loh niin a sawi.
Natna inkaichhawn theih lama an ram mi thiam, Dr Anthony Fauci chuan Krismas laia intlawhpawh chuan invenna bikim la tawhte pawh Omicron a tikai nasa zual dawn tih a lo sawi lawk tawh.
Centers for Disease Control & Prevention-in Very High list for Covid-19 tia a dah ram 80 chuang awm tawhin American-te chu heng ramah hian zin a phal lo va. Ram hlauhawm zingah hian Europe ram pum deuhthaw a tel.
France leh Germany chu Omicron danchah tuma inzin pawh khap zingah an tel a; Netherlands phei chuan Krismas laiin inkharkhip khauh tak a kalpui dawn.
UK-ah pawh Thawhtanni khan Prime Minister Boris Johnson chuan Omicron a darh chak em avangin England-ah inkhuahkhirhna thar an mamawh tih a sawi a, inkhuahkhirhna thar tur erawh a sawi lo.
London Mayor Sadiq Khan chuan vantlang him zawk nan Trafalgar Square-a Kum hlui thlah leh kum thar lawmna hun an huaihawt thin chu an thulh fel tawh tih a sawi.
Thawhlehni khan New Zealand chuan ram dang nena inzin pawhna hawn a tum hun sawnin February thla tawp atan a sawn hla.