Kawrthah South Kuhva Chingtute Society-in Myanmar atanga dan lova Mizorama kuhva lak luhin Mizorama kuhva chingtute harsatna tam tak a thlen thu sawiin, a tawlh ruk chungchanga Champhai Bawrhsap Maria CT Zuali hmalakna lawmawm an tih thu leh an thlawp thu an sawi.
Champhai bawrhsap hmalakna tihthuanawp tuma dodalna awm chu pawi an tih thu Kawrthah South Kuhva Chingtute Society chuan an sawi a. “Thil dik lo dodaltu Champhai bawrhsap hmalakna hi thlawp turin Mizo mipui zawng zawng kan sawm a, Mizoram sorkar thuneitute pawh dan lova lo lut Burma kuhva titawp tura theihtawp chhuah turin kan ngen,” an ti.
Kawrthah South Kuhva Chingtute Society chuan, “Burma kuhva tawlh ruk tihtawp a nih theihna tura theihtawp chhuaha Mizoram chief minister leh prime minister hnen thlenga memorandum thehluttu, Vanramchhuangi chungah pawh lawmthu kan sawi,” tiin, a ngenna ngai pawimawha Mizoram sorkar leh sorkar laipui pawhin hma a lak nghal an beisei thu thuchhuah siamin an tar lang bawk.
Champhai Thalai Pawl pawhin dan lova kuhva rah tawlh chungchanga Champhai bawrhsap hmalakna an thlawp thu thuchhuah siamin an tar lang a. “Dan lova sumdawngten dan hmanga rorel an phut ngam a nih chuan dan anga sumdawng turin kan phut,” an ti.
MZP Hqrs., Champhai pawhin bawrhsap hmalakna an thlawp thu puangin, Champhai Bawrhsap Maria CT Zuali chu ‘Champhai hmangaihtu a ni’ an ti a. Champhai tana tan la zel tur leh hma lam pan zel turin duhsakna an hlan bawk.