Congress party Treasurer Zodintluanga Ralte chuan, “MNF sorkar kan hrawn mek hian sorkar nawn an tum lo tih a chiang,” a ti.
Nimina Congress party hruaitute’n thuthar thehdarhtute an kawmnaah thu sawiin, “MNF sorkara minister te hian an kalna lam apiangah hmingchhiatna hlir an nei a. Sum umin an tlan emaw tih tur khawpin an khawsa a ni,” tiin, MNF sorkarin sorkar nawn an tum tawh lo tih a chian thu a sawi.
Tun hnaia khawchhak lama dan loa kuhva sumdawnna chungchangah, dan leh thupek kenkawh kengkawhtu District Magistrate laka FIR thehluh police te’n rang taka an umzui laia, mi thenkhat FIR thehluhin bawhzui a hlawh lo chu sorkar mualphona lian tak a nih thu a sawi a, “Hetiangte hi sorkar letling, sorkar awm lo, ‘jungle law’ sorkar niin dan kengkawhtu District Magistrate laka FIR thehluh ngamna ramah MNF sorkar hian min hruai lut a ni. Chuvang chuan, kan sorkar hi chu ding reng tlak a ni lo tih a chiang,” a ti.
Zodintluanga Ralte chuan, “Sorkar hnathawkin an sawi dik em em mai chu, minister hmu tura hmel hlim taka lut thin tam takte hi an lo chhuak leh lam chu an beisei ang an hmu lo tih an hmelah a chiang em em tih hi a ni. Chuvangin, he sorkarah hian a naranin beiseina nei lovin an beiseina pawh a tawp tawh tih a chiang,” a ti a; MNF sorkar hian kum hnih erh awrh chauh an nei tawh chungin, an hmang zo ang emaw chu aw tih hi mi thenkhat ngaihtuahnaah a awm niin a sawi.