Covid-19 leng avanga Chinese khawpui pakhat, Xi’an-a chengte chu pawn chhuak thei lova an inkhung rei tawh avangin ni tin mamawh pawh an tlachham tan hle tawh a. Pawisa hmanna tur pawh a awm loh avangin thil neih an inthleng tawn.
Social media-a an tar lanah chuan mi chengte hian an hmanrua (tech gadget)-te chu chaw nen an inthleng kual vel hlawm.
Khawpuia cheng mi maktaduai 13 chuangte hi December 23 atang khan khung an ni a, an ei tur pawh an lei thei lo.
Tun hnaiah mi tam takin khung beh an nih dan chu social media-ah a lungawithlak loh thu an tar lang hlawm.
Thuneitute chuan in tinah a thlawnin ei tur an sem a; mahse, hengte hi kham khawp a ni lo va, thenkhat phei chuan an dawng lo niin an insawi.
Social media site Weibo-a thlalak leh video an tar lanah chuan sikret leh zikhlum, dishwashing liquid leh apple, sanitary pad leh thlai an inthleng laite a lang.
Video pakhatah chuan Nintendo Switch console chu instant noodle leh chhangthawp nena an inthleng lai a lang bawk.
“Ei tur an neih tawh loh avangin in (building) khata chengte chuan thil an inthleng sup sup a ni,” tiin mi cheng pakhat, Wang chuan Radio Free Asia a hrilh a. Mi pakhat chuan a smartphone leh tablet chu buhfai nena inthlengpui tur a zawng nia sawi a ni bawk.
“Tanpuitu nei lo khawpui mite hi hi barter system-ah an let leh mek a – alute chu cotton swab nen an inthleng a ni,” tiin Weibo-a mi pakhatin a tar lang a. ‘Hmanlai khawsak danah’ an kir leh hlawm thu an sawi.
Hetih lai hian mi dang tam tak pawhin hetianga thenawmte nen an neih leh neih loh ang anga an inpui tawn chuan an rilru a khawih hlawm hle thu an sawi bawk.
Xi’an khawpui hi tun hnaia China-a Covid a darhna lian ber a ni a, tual chhung thuneitute chuan inkhuahkhirhna khauh tak kalpuiin sawisel pawh a hlawh.
Tun hnaiah khawpui chhim lama Mingde 8 Yingli housing compound-a chengte chuan January 1 khan an in chhuahsana quarantine facility-a awm tura hruai an nih thu a sawi.
Mi cheng pakhat chuan a pa chu heart attack avangin a thi thut a, Covid vel avangin damdawi inin an lo dawngsawng duh lo niin a sawi a. Damdawi in erawh chuan hemi chungchang hi an sawi ve lo.
Xi’an hi China-a thla eng emaw zat chhunga a darh nasat ber tum a ni.
Thawhlehni khan hri kai, natna lang chhuak lem lo mi pathum hmuh a nih avangin Yuzhou khawpui chu kharkhip leh an ni.
Mi maktaduai 1.1 vel chenna, Xi’an atanga km 500 vela hlaa chengte hi ina awm vek tura tih an ni.
Thawhtanni zan atang khan lirthei chhuah phal a ni lo va, dawr leh sumdawnna pawh ni tin mamawh chauh hawn phal a ni.
Hetianga inkhuahkhirhna kalpui hi China-a kum thar, thla thara Lunar New Year leh Beijing-a Winter Olympics tan hma lawka an kalpui a ni.
&&&&&&