Nimin atang khan kum 2022 atan sorkar pisa hawn tan a ni a. Pisa kai thawktu leh dawrtu mipui hmuh tur erawh an tam lo hle.
The Zozam Times-in kum thara sorkar pisa hawn tan niah hmun hrang hranga sorkar pisa a tlawh kual atanga a lan danin, pisa tam tak chu dawr theiha an la awm loh bakah, pisa thenkhat inhawngte pawh thawktu an la kal mumal loh avangin a la ruak hlawm hle a. Thawktu mai piah lamah pisa dawrtu mipui hmuh tur an la awm mang lo a ni.
A bik takin Mizoram Secretariat building leh sorkar pisa pawimawh hrang hrang awmna hmun Mizoram New Capital Complex (MINECO)-ah pawh sorkar pisa hawn tan nia thawktu pisa kai zingah, chawhma chhung chauh hun hmanga chawhnu hera haw leh nghal an awm nual nia sawi a ni. “Kum thar tir ret te a ni bawk a, kan la inthlahdah tlang deuhte pawh a ni mai thei e,” tiin duty pakhat chuan The Zozam Times a hrilh.
Kum thar atana sorkar pisa hawn tan niah hian Minister zingah Deputy Chief Minister Tawnluia, Home Minister Lalchamliana, Health Minister Dr R Lalthangliana leh Robert Romawia Royte, Sports Minister te’n pisa an thutchilh nghal a ni.