Sorkarin inkharkhip leh khapna kalpui tum lo


Tun dinhmunah Covid-19 hri thar darh leh mek mah se, tual chhungah inkharkhip leh inkhap zawngin sorkarin kal tumna a neih rih loh thu Mizoram Health Minister Dr R Lalthangliana’n a sawi.
Health Minister hian nimin khan a pisa-ah MJA Gen. Hrqs. hruaitute chu kum thar thingpui inpuiin inkawmna hun a buatsaih a. He hunah hian Dr R Lalthangliana chuan Mizoram chu Covid-19 lengin tibuai mah se, inkharkhip leh inkhap zawnga sorkarin kal tumna a neih rih loh thu leh sorkar inkaihhruaina a siam chu ngai pawimawh turin mi tin a beisei thu a sawi.
Tuna Omicron hri thar darh leh hian India ram khawpui eng emaw zat tibuaiin inkharkhip zawnga kal an awm leh mek thu a sawi a. “Mizoram chu Covid-19 lengin tibuai mah se, India ram leh a bikin hmarchhak state-ah chuan a tuar na lo pawl leh he hri thihpui pawh a tlem pawl a ni thei chu kan tanrualna vang a ni,” Health Minister hian a ti.
Mizoramah Krismas leh kum thar vuakveta punkhawm inkhap hleihtheih a nih loh thu health minister hian a sawi a. Biak ina inkhawm, zai leh ruai theh chungchangah pawh sorkar chuan kohhran tin rel dana a dah mai thu sawiin, “Sorkar ang chuan, ‘Ti suh u,’ tia inkhap kan tum lo a, medical lama mi thiamten kan zavaia kan zawm tur SOP an siamte ngai pawimawh tur erawh chuan chiang takin kan inhrilh a ni,” a ti bawk.
January 3, 2022 khan kum 15-18 inkar tan Covid-19 hri danna pek tan tura khuhhawnna Aizawlah hman a nih thu leh pek mek zel a nih thu a sawi a. Tunah hian district tina district immunization officer-ten an huam chhunga pek dan tur an ruahman dawn tih sawiin, Mizorama pek theih zat hi chhut mek a ni chungin, mi nuai 1 atanga nuai 1.5 inkar vel awm nia hriat a ni tih a sawi.
“Vaccine hi a rawn thlen belh zel tura ngaih a ni a, kum 15-18 inkar, kum 2007 kum leh hemi hma lama piangte chuan vaccine hi la vek turin ka ngen a ni,” Health Minister hian a ti.
MJA President Zonunsanga Khiangte chuan journalist-te ngaihven a, ngaihsak reng thintu Dr R Lalthangliana’n kumthar puala a hmasa ber atana MJA hruaitute a kawm chu lawmawm a tih thu sawiin, hri leng dona kawngah pawh MJA chuan a theih ang tawka a thlawp tawh angin, a tul dan anga thlawp zel an inhuam thu a sawi a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427