AUTO CORNER
by Ruata
2021 chhunga India ram
lirthei industry dinhmun
Nikum hmasa, kum 2020-a khawvel huapa Covid-19 hri a darh chiam hnu khan India rama lirthei industry te chuan ngai awh tumin nikum khan an bei chho nasa a. Hma pawh an sawn viau a, hrileng avang bawkin an duhthusam ang erawhin an che vek thei lo hlawm niin a lang.
Tun tum Auto Corner-ah chuan nikum chhunga lirthei industry huanga hmalakna leh thil thleng chhinchhiahtlak thenkhat kan tarlang dawn a ni.
Vehicle Scrappage Policy
Hemi chungchanga thil tam tak sawi a awm hnuah India sorkar chuan Vehicle Scrappage Policy a pass a. He policy hi lirthei lian chi heavy commercial vehicle huanga hman tan tur a ni a, lirthei lian zawng zawngte hian April 1, 2023 atangin fitness test an hmachhawn vek a ngai dawn a. Lirthei dang ho chuan June 1, 2024 atangin test hian nei ve thung dawn a ni. He test hi vehicle registration dam hun chhung a tawp huna neih chauh tur a ni dawn a. Lirthei te hi test theih zat an test kim hnua a fit tawh loh chuan tihchhiat tur a ni tawh dawn a ni. Chiang zawka hre duh tan chuan a inchhiar zui theih awm e.
Electric hmang lamah..
Nikum chhoah khan electric hmang lirthei siamtuten hma an la nasa hle mai a, hetiang kawnga hmalakna a tam pawl tak kum tih te pawhin a sawi theih ang. Lirthei siamtute hian electric hmang lirthei an tlangzarh tur thu an puan loh tal pawhin an hmalak tum dan leh an company hmathlir tal an puangzar nasa hle a ni. Market lama hmahruaitu Maruti chuan hybrid leh CNG lamah hma la nasa viau rih mahse an electric hmang lirthei hmasa ber chu kum 2025-ah tichhuak hman turin ruahmanna an siam a. Tata Motors electric division thar dinin kum 2026-ah chuan electric hmang lirthei 10 tihchhuah an tum a ni. Mahindra in kum 2027-ah lirthei 8 tihchhuah an tum bawk a, Hyundai in kum 2028-ah lirthei 8 tihchhuah an tum bawk a ni.
Himna lam..
India ram sorkar chuan India rama car zawng zawngah insut nikhuaa mihring chuangte himna atana bag puar rawn chhuak thin (air bag) chu pahnih tal lirtheiah vuah tur tiin thu a chhuah a. April 1, 2021 hnulama lirthei chhuak thar chuan hei hi a nei vek tur a ni a. Lirthei hei aia hmaa chhuak tawh ho chu nikum December 31 thleng kha hun pek an ni thung a ni.
Ford in India chhuahsan
Ford chuan a thawhpui Mahindra nen tha taka an thawkho emaw tih laiin an inzawmna a tawp thut mai a. He American brand tan hian Mahindra nena an inthen hunin a zir loh avang bawk nen India ram chhuahsan mai loh chu duhthlan tur a nei ta lo a. Ford hian Mahindra nena hmalam hun atana ruahmanna an lo neih lawk tawh zawng zawng pawh an titawp vek a ni. Ford chuan an lirthei siamchhuahna hmun an khar vek a, an lirthei erawh India ramah CBU (completely built unit), siam pum sa vekin an rawn thawn lut reng dawn thung a, an service network pawh zaa 90 chuan hna an thawh chhunzawm zel dawn tih an puang bawk.
Khawvel huapin semiconductor indaihlohna a nasa
Kum 2020 atanga intanin nikum chho khan khawvel pumah lirthei siamna atana tangkai, a electronic part lama mi, semiconductor chu lirthei company ten nasa takin an indaih lo a. Hei hi a chhan nia lang chu kum 2020-a lirthei hralhchhuah tlem lutuk khan semiconductor demand a tihniam vak a, hemi hnuah mamawhna sang leh thut hian a siamtute leh a mamawhtute lamah harsatna a thlen ta a, duh ang an hmu thei ta lo a ni ber. Pakhat lehah chuan khawvel pumah electronic industry huangah laptop, PC, phone, gaming console leh thildang danga nasa takin leitu an pun vang niin tarlan a ni bawk.
Lirthei thianghlim zawk
Electric hmang lirtheite hian nakin lawkah kan khawlai hi an la luah nasa dawnin lang mahse tunhnai tut tutah hetiang hmalakna hi kan la hmu thei lo a. Petrol aia boruak chhia pechhuak tlem zawk CNG hmang lirthei chu kan company lian hoin an tichhuak nual a. Sorkar pawhin lirthei tui thianghlim zawk, ethanol telna lirthei tui hrang hranga hmalakna lama tan lak a tul thu an sawichhuak nasa bawk a ni.
Heng lo pawh hi hmalakna tha tak tak lirthei himna leh khawpui a fai zawkna tur te a awm bawk a. A tawp khar nan nikuma lirthei tlangzarh thenkhat han tarlang leh ila.
Kum 2021 January 7-ah MG Hector Plus, February15-ah Renault Kiger, February 22-ah Tata Safari thar, June 18-ah Hyundai Alcazar, June 28–ah Skoda Kushaq, July 13-ah Mahindra Bolero Neo, August 14-ah Mahindra XUV700, September 23-ah Volkswagen Taigun, September 27-ah Force Gurkha thar, October 18-ah Tata Punch, Novemeber 10-ah Maruti Celerio thar, te a chhuak a. Heng bakah hian lirthei man sang ho Mercedes Benz, Land Rover, Audi, BMW leh adangte atangin a chhuak thar nual bawk a ni.