Mizoramah kum 15-18 inkar tana Covid-19 hri danna ‘Covaxin’ la tawh mi 446 an chuang tawh.
January 3 khan India ram puma hawn a nih rualin Mizoramah pawh Health Minister Dr R Lalthangliana hoin kum 15-18 inkar tan Covid-19 hri danna pek tan tura khuhhawnna Aizawl-ah hman a ni a. Kum thar chawlhte a la nih avangin hemi ni hian Aizawl West hnuaia ruat bik 28-te Covaxin pek an ni.
Aizawl district chhunga ruat bik chauh launch-naah mi 28-te pek chhuah a nih hnuah, January 4, 2022 khan kum 15-18 inkar tana Covid-19 hri danna hi mi 416 hnenah pek chhuah leh niin, heti hian Thawhlehni thleng khan mi 446-in first dose an la tawh a ni.
Kum 15-18 inkar tana hri danna Aizawl West hnuaia ruat bik chauhte hnena pek chhuah a nih hnuah, nimin atang khan district dangin Routine Immunization (RI) leh Polio vaccine nen district tina district immunization officer ten an huam chhunga pek dan tur ruahmanna kalpui turin an la chhuak nia thudawn a ni.
Thawhlehnia MJA Gen Hqrs hruaitute nena an inkawmnaah health minister hian kum 15-18 inkar tana Mizorama Covaxin pek theih zat hi chhut mek a ni chungin, mi nuai khat atanga nuai 1.5 inkar vel awm nia hriat a nih thu leh, vaccine hi a rawn thlen belh zel tura ngaih a nih thu a lo sawi tawh a ni.
Hetih lai hian January 16, 2021 atanga ram puma Covid-19 vaccine pek chhuah a nih atanga vawiin ni thlengin sorkar chawlhah pawh chawl ve thei loin vaccine pek chhuah hna an la thawk chhunzawm zel niin State Immunization officer Dr Lalzawmi chuan a sawi a. “Thawktute hi kan hah tawh khawp mai. Sorkar chawlhah hian kan chawl ve châk thin. Ni tin hian hna thawh hun chhung pangngaiah hna hi kan thawk zo hman ngang lo a, homework kan nei kum tluan zak a ni ber e,” tiin, tun January thlaah phei hi chuan Covid-19 chauh lo pawh vaccination thil bikah an buai zual dawn niin The Zozam Times a hrilh.