English Football League Cup semi-final zanin a Liverpool leh Arsenal ten first leg an khelh tur chu a thlengtu tur Anfield club in Covid 19 avanga harsatna an tawh belh nasat avangin an sawn hla.
Liverpool hian Covid 19 case an club a an neih a pung zel a, Nilaini khan an assistant manager Pep Lijnders chu Covid 19 a kai tih hmuhchhuah a nih avangin an first-team training hmunpui chu an khar tawh.
Sponsortute avanga Carabao Cup tih hming an vuah semi-final first leg hi karleh Ningani zanlaiah khelh a ni dawn a, a karleh Ningani zanah Emirates Stadium-ah second leg khelh a ni leh ang.
Chiang zawkin
Liverpool hian Thawhlehni khan Covid 19 case an neih belh zel avangin inkhel sawnhlat hi an dil tawh a. EFL lamin club nen inbiakna nei reng chungin tournament kalpui zel dan tur an rel hnuah an remti.
Nilaini khan Reds in an training hmunpui chu darkar 48 chhung tal an khar tawp tur thu an sawi a. Hri inkai darh zel chhut chah an tum.
Pathianni zana Chelsea an hmachhawnin manager Jurgen Klopp chu Covid a kai avangin Lijnders hian a thlak tawh a. Player zingah Alisson, Joel Matip leh Roberto Firmino te pawh inkhel loh phah bawkin staff lamah mi pathum an kai tawh bawk.
Hei bakah hian African Cup of Nations khel turin Mohamed Salah, Sadio Mane leh Naby Keita te an liam tawh avangin Liverpool first team a pan hle a. Pathianni zan hian FA Cup third round-ah Shrewsbury Town nen Reds hi an inkhel dawn a, hei erawh tihdanglam a la ni lo.
EFL chuan Liverpool chungchangah hian thuchhuah siamin, “Thawhlehni a sawnhlat Liverpool in an dil hnuah an club a Covid case a pung nasa zual hle a. An dinhmun hi ngun taka kan thlir hnuah League chuan Liverpool ngenna hi a pawm.”
“He thutlukna hi siam awlsam ni lovin kal zel dan tur uluk taka ngaihtuahzui ngai a ni a, mahse inkhel sawnhlat hi tih theih awmchhun a ni a, kan zavaia kan himna leh hriselna ngai pawimawh chungin he thutlukna hi kan siam.” tiin an sawi.
Liverpool pawhin hemi chungchangah hian EFL leh Arsenal hnenah lawmthu an sawi a. “Hun harsa tak kan paltlang laiin EFL leh Arsenal bakah club pahnih tantute dawhtheihna avangin lawmthu kan sawi.” an ti.