Health minister Dr R Lalthangliana’n nimin khan Central YMA hruaitu thar te a pisa-ah kawmin, COVID19 chungchang leh a kaihhnawih pawimawh dangte a sawipui a, VLTF/LLTF tihnun thar leh a tul thu an sawi.
Health minister leh CYMA hruaitute chuan COVID19 do kawnga sorkar, YMA leh tlawmngai pawl dangte thawhho zel dan tur pawh an sawiho a. COVID variant thar ‘Omicron’ lo thleng thei chungchanga lo inruahman dan turte pawh an sawiho.
VLTF/LLTF tihnun thar leh a tul thu bakah media hmanga COVID chungchanga mipui ziritirna uar zawka kalpui tul an tih thu pawh health minister hova thukhawm chuan an sawi a. COVID hri kai damlo enkawl dan chungchangte an sawi bawk.
YMA hruaitute chuan sorkarin YMA general conference hman a phalsak mai ni lova ruahmanna him leh felfai tha tak a siamsak avanga an lawmthu Health minister chu an hrilh a ni.
Nimin vek khan Health minister Dr R Lalthlangliana chuan Aizawl city local council association hruaitute pawh kawmin, hri leng boruak leh a inven dan leh a kaihhnawih thu pawimawh te a sawipui bawk.