Tun dinhmunah Mizoram sorkarin zan curfew chungchangah a hranpaa ngaihtuah tumna a la neih loh thu Dr Pachuau Lalmalsawma, Official Spokesperson & State Nodal Officer, Covid-19 chuan a sawi.
The Zozam Times zawhna chhangin Dr Pachuau Lalmalsawma chuan zan curfew hlih tumna emaw, kalpui zel dan tur emaw ngaihtuaha sawiho tumna a la awm loh thu a sawi a. “January 7 hian home minister hoin thutkhawm a awm dawn a. He thutkhawmah pawh hian agenda hi kan tilian a, zan curfew chungchang pawh a leng ve thoin ka ring. Chutih laiin, kan sawiho ang tihna a ni kher chuang lo a. Hlih tumna emaw, kalpui zel tur emaw, tihna pawh a awm chuang lo, engmah thawm a lian lo hrim hrim,” a ti.
Tun hnaiah zan curfew tihtawp duhin mi thenkhatin social media kaltlanga thawm an chhuah chungchangah, “Mipui kan thuhmun loa, thil reng rengah a phunchiarte hi a percentage la ila chuan an tam vakin ka ring lo. Thuawih taka mahni tan a tha tih hriaa thawm nei ve lem lo hi a tam zawk an nih ka ring,” tiin Dr Pachuau Lalmalsawma chuan The Zozam Times zawhna a chhang.
Zan curfew hlip duha social media platform-ah mi thenkhatin hma an lo la a nih pawhin an phunna pawh chu a dik lo an tihsak loh thu te, huata an lak loh thu leh an duhzawng sawi turin zalenna an neih thu a sawi bawk.
India ram chhung hmun thenkhatah Covid-19 hri thar, Omicron avangin zan curfew an thar thawh leh thu sawiin, “Mizoramah hi chuan zan curfew hi kan kalpui reng a nih avangin, hri thar hi a lo lut ta a nih pawhin, state dangte tawrhna ai chuan kan tawrhna hi a ziaawm phah phian awm mang e tih hi kan rin dan a ni,” tiin, pawlawhna hian rah chhia a chhuah deuh em aw tih tura a awm thu a sawi.
“Mizoram sorkarin hri leng laka himna tura inkaihhruaia (SOP) nasa takin a tidul tawh a. SOP kan tihdul hian ken tel tam tak a nei zel a. Chutiang chiahin zan curfew hi hlip dawn ta chiah ila, a hma ai khan mipui nungchang hi a chhe leh zualin a rinawm,” a ti a. Sorkar hian mipui tihhrehawm hrim hrima khuahkhirh vak vak hi a tum ber a nih lem loh thu leh, a hun mil zela inher rem a, thil thlen dan ngaichang chunga insiam rem zel hi a tum mai chauh zawk nia sawiin, “‘Tun dinhmunah…’ tih zel hi kan kal dan tur a ni,” a ti.
Dr Pachuau Lalmalsawma chuan, “Khaw vawt hnuaiah zan curfew bawhchhiaten tlem an lo chawi chu thil tam tham a ni chuang lo a, chutianga han thlakhlelh tham tur pawh a awm chuang lo,” a ti a; Covid-19 dona kawnga sorkar hi an thlawp tha duh lo a nih pawhin, a hmatawnga awm thawktute hi thlawpna pek nasat an phu thu a sawi a ni.