- Lalhruaitluanga Chawngte
Thumal pakhat ‘vannei’ tih a awm a – a awmzia kan hre vek ang – a hman pawh kan hmang awl lo ang.
|awngkam tualleng a ni a, tawngkam tlanglawn a ni. Ni tina kan tawngkam leklamte zinga mi a ni ang. |awngkama kan hman bakah a hmuh pawh kan hmu thin: mi vannei kan hmu thin ang a, mi vannei nih pawh kan chak ang.
Mi an vannei kan tih chuan, an tih ni lo thil lawmawm an tawng tih kan sawina te a ni chawk a, an chunga thil thleng, a tha lam, lawmawm leh awhawm, mahse anmahni sualchhuah ni si lo, an kutchhuak leh kutkawih ni si lo te, an theihtawp chhuahna thil a nih pawhin an theihtawpin a daih loh thil, chutiang kan sawina te a ni ang.
He thumal nena inep chiah, thumal dang a awm a, ‘vanduai’ tih hi. Hei pawh a awmzia kan hre vek ang. Mi an vanduai kan tih chuan an tih ni lo thil, a lawmawm lo lam an chungah a thleng tihna te a ni ang.
Hnam dang pawhin chutiang thumal chu an nei a, ‘vannei’ tihna te, ‘vanduai’ tihna te, chutiang sawina chu hnam tinin an neih ka ring.
He khawvela awmte’n kan hmuh tlan thap thil thenkhat, ni te, thla te, arsi te, thil dang pawh a awm ang, chutiang sawina chu hnam tinin kan nei a, mi tinin kan neih, nu leh pa te, pi leh pu te, chutiang sawina chu hnam hrang hrangte hian kan nei thin. Pakhat, pahnih, pathum tih te pawh a ziah dan kan hriat hma pawhin a sawi dan kan nei thin. A chi dang pawh sawi tur a la awm ang.
‘Vannei’ leh ‘vanduai’ tih te pawh, hnam hrang hrangin chutiang sawina chu kan nei. Vanneihna leh vanduaina a awm tih kan rin vang a ni ang.
A awmzia ni ta chu- mihring hian a tih theih loh thil, a inrawlh phak lohna a awm tih hi a hria a, chumi titheitu chu a awm tih pawh a hria. Mihring hian a thu lova thil thleng a awm a, a sawi phak loh thil pawh a awm tih a hria. Mihring theihna leh chakna te, mihringin thil hrang hranga theihtawp a chhuah te hi a hluin a ropui a, mahse a tawk lo. Daih chin leh daih loh chin a nei. Chumi bak, mihring tih theih chin bak chu a awm. Chutiang thil chu a tha lam a nih chuan mihring hian vanneihna a ti a, a tha lo lam a nih chuan vanduaina a ti tihna a ni thei ang. Hnam tinin ni leh thla kan hmuh avangin a sawina thumal kan nei a, hnam tinin mihring tih theih loh leh mihring inrawlh phak lohna a awm tih kan hriat avangin chutiang sawina chu kan nei tihna a nih dawn chu. Kan neih ve loh octopus chu a sawina tur thumal kan nei lo a, ngotekherh pawh a nei ve lo hnam chuan a hming pawh an nei lo. Vannei tih te, vanduai tih te chu a sawina kan nei thup a, a tlukpui thlengin kan nei ang. Mihring chunga mi, mihring tihtheih loh titheitu a awm tih kan hriat hlawm vang a ni.
Miin chumi a hriat poh leh a tlawm a, lawmna tur pawh a ngah thin. Mi fing apiangin chu chu an hre chiang a, chumi hre chiang apiang chu an fing tihna te pawh a ni ang. Chumi hriat chian loh chuan chapo mai te pawh a awl a, pawisak neih loh te, fimkhur loh te pawh a awlin ka ring. Tin, tawng pawng tal bawrh bawrh mai te pawh a awlin a rinawm.
Kan ni tin nun, kan ni tin khawsak hi han thlir ila, vanneihna chu a tam asin. Kan tih theih miah loh thil a tha lam leh lawmawm lam kan chunga a thlen hnemzia te, chumi vanga him, chumi vanga vawiin hun thleng kan nihzia te hi a chiang asin, a hmu thiam tan chuan. Kan tih ni miah lova vanduaina kan han pumpelh te hi vanneihna asin. A pumpelh pawh kan pumpelh ni tin zan tin asin.
Kum kan hmang tluan thei hi kan vannei asin. Kan tih ni miah lo thil, a tha lam kan chunga a thlen mawlh mawlh vang a ni. Kan va han vannei em! Kum thar kan han chuangkai te hi, kan theihna leh chakna vang chu a ni lo ti r’u? A chakna leh theihna vang emaw ti tlat an awm a nih chuan kawng an bo tihna a ni ang.
Kan vannei mang e – Lalpa khawngaihna a ni e.
Kum thar chibai u.
“Tin, LALPA chu Josefa hnenah a awm a, tichuan ani chu mi vannei tak a ni a.” – Bible