Higher & technical education minister Dr R Lalthangliana’n Mizoram sorkar hnuaia College principal te ko khawmin nimin khan New education policy (NEP) chungchang leh pawimawh dangte a sawipui a. NEP-in inkaihhruaina a siam zinga implement theih ang te kalpui tan an rel.
H&TE minister hova thutkhawmah hian sorkar laipui education policy thar – NEP 2020 Mizorama hmang tura hmalak chhoh dan, H&TE commissioner kaihhruai Task force din a nih thu te sawilan a ni a. He policy tharah hian kalphung inthlak a tam dawn avangin college zirtirtute bakah mipuiah pawh inhrilhhriatna leh sawihona zau zawk neih a tul dawn thu an sawi.
Mizoram college-in affiliation a neihna Mizoram University pawhin NEP chunghangah hian task force dinin, thui tak hma an la tawh tih he thutkhawmah hian report a ni bawk.
H&TE minister hova college principal thukhawm chuan NAAC accreditation chungchang pawh sawihovin, accreditation la nei ngai lo college pahnih an awm mek thu an sawi a. Accreditation hmu tawh zingah validity tawp tawh an awm thu pawh sawiin, Govt. Serchhip college-in tunhnaiah NAAC accreditation A grade an hmuh thar thu leh Mizoram college hrang hrang zingah A grade nei mek awmchhun an nih thu an sawi.
RUSA hnuaia zirtirtute hlawh chungchang pawh sawiin, sorkar laipui vawiengemawzat dawr a nih tawh thu leh a hun taka zirtirtute hlawh tur release a nih theihna tura sorkar laipui phut anga utilisation certificate pawh a hun taka thehluh a ni chungin sorkar laipuia ministry of finance-in OM thar a tihchhuahah funding system kalphung a thlak danglam avang leh he kaihhruaina thar zawm kim lo chu ministry tinah funding pek tlai a nih tak thu an sawi.
Zirtirtute hlawh tur chu H&TE minister-in theihtawpa a umzui thu leh um chhuah theih thuai beisei a nih thu an sawi a. Finance ministry inkaihhruaina tharin a phut ang 99% vel Mizoram sorkarin a peihfel tawh a, tun kar chhungin za ah za zawhfel theih an beisei thu he thutkhawmah hian report a ni bawk.
Non teaching staff leh staff dang indaihlohna chungchangah H&TE minister chuan college tinte chu an dinhmun chiang tak ziaka sorkar hriattir turin a hrilh a ni.