RT-PCR khawl bun chak a ni hlei thei lo a mak tawh zawk
Mizoram mipui zawng zawngin ZMC a RT-PCR khawl awm kan la inrintawm luih luih reng a, hmun thenkhatah RT-PCR test ngei beiseina leh phutna a nat tawh em avangin min zo lo lam deuh chu a ni. Aizawl atang pawhin ZMC kal turin thapui thawha chet a ngai a, kum a vei hnuah pawh khawl dang hman theih a la awm thei lo!
Hetih lai hian Lunglei a MLA pakhatin RT-PCR khawl a pek chu hman theih tura buatsaih leh buaipui mek a la ni zel a, an peihfel thuai pawh i beisei zel bawk ang u. Kan ram mipui hian nasa takin kan mamawh a, neih belh zel pawh duhthusamah chuan a ni bawk.
Lunglei leh chhim lam tana thu lawmawm a awm chho mek nia a lan lai hian UNICEF-in ICMR kaltlanga Champhai District Hospital tana RT-PCR khawl a pek chu October 12, 2021 khan damdawi in hotute hnenah hlan ni tawh mah se tun thlengin sample endik nana hman theih turin bun a la ni lo thung a, hei pawh hi engtia rei nge nghah leh ngai ang ni?
Hmasawnna hi thenkhatah chuan a chak viauin lang thin mah se, sorkar hian pawimawh si, ngaih pawimawh hmasak loh hi a nei nual niin a hriat a, inenfiah deuh chu a ngai thin khawp mai. Theihtawp chhuah an intih lai hian khawi emaw laia lo hnufum pawl a awm leh thin hi a pawi a, hri leng kara khawsa kan ni tih hi theihnghilh lo hram thin teh se.
Champhai lama RT-PCR khawl hi Champhai hospital Eye award-ah bun theih tura ngaih ni mah se he ward emaw, a bun nghehna tura ruahman, TrueNat Laboratory awmna bulah emaw pawh kutthlak a la ni lo a, a awmzia mipuiah hrilhhriatna a awm chuang bawk si lo. RT-PCR mamawhna hi a sang telh telh dawn a, RAT test bansan a, RT-PCR ngei hnianghnara kan neih hun a va nghahhlehawm em.