AC Milan chuan Serie A hmahruaitu an hmelma Inter Milan nena an inkar chu point khat chauh ni turin an ti zim a. Jose Mourinho-a AS Roma 3-1 in an hneh.
Ningani zana Serie A inkhelah San Siro-ah Milan hian duhthusamin bul an tan a. Milan striker Olivier Giroud chuan Chelsea tana a khelhpui thin Tammy Abraham hand-ball avangin penalty atangin goal hmahruai a khung.
French striker hian a la tar lo tih tilangin goal ban a pet per atanga ball kal chu Junior Messias-a’n goal-ah a chantir nawn leh a. Mourinho pawlte tan England striker Abraham chuan goal khat khung ve mahse second half-ah inkhel dahtha turin Milan substitute Rafael Leao chuan an goal thumna a khung.
Milan tan Zlatan Ibrahimovic chuan goal li-na khung theihna nei mahse huntawp dawna Gianluca Mancini penalty chawi chu Roma goalkeeper Rui Patricio chuan a dansak.
Mancini hi yellow card pek nawn a nih avangin hnawhchhuah a ni a. Minute 74-naah right wing-back Rick Karsdorp hnawhchhuah a nih tawh avangin Roma in player pakua in inkhel an hmang zo.
Tunhnaia an club a Covid 19 a darh avanga buai ve tho Milan coach Stefano Pioli chuan, “He hnehna chang tur hian kan thawkrim a, kan zavai thawhrah a ni. Player leh coach te hian hmasawn kan duh vek a, tihsualte nei thin mah ila kan inzir zel. Tunah kan kim lo hle a, mahse ni thum hnuah inkhel pawimawh tak hmachhawn leh turin kan inbuatsaih ang.” a ti.
Inter an khel thei lo
Champion lai Inter Milan chu Stadio Renato Dall’Ara-ah Bologna nen inkhel tur an ni a, mahse Bologna team-ah Covid 19 case a tam avangin tualchhung hriselna lam thuneituten team chu ni sarih atanga ni 10 inkar inkhunghrang turin a ti.
Serie A lamin inkhel thulh a duh loh avangin Inter hi khelmualah an inlan thova, official-te pawhin inkhel kalpui dan tur ang zawm thlapin Bologna an inlan thei lo.
Serie A inkaihhruai danah a inlan thei team hi 3-0 a chak tir tur an ni a, a inlan lo lam hi point khat paihsak an ni thung ang. Nimahsela season liamta a Napoli in he dan hi an ‘appeal’ hnuah Juventus nen inkhelh that tir an ni a, hetiang hian kalpui leh a ni ang em tih a chiang lo mek.
Inter director Beppe Marotta chuan thuneitute lam thil kalpui dan chu club-te tan a fuh loh thu a sawi zui.
Juve leh Napoli an intluk
Allianz Stadium-ah Juventus in Napoli an mikhual a, second half-ah an si phurh sutin 1-1 in an inhnehtawk.
Napoli in an club chanchina goal khung hnem ber Dries Mertens hmangin minute 23-naah goal an khung hmasa a, khung belhna hun an nei nual.
First half a kheltha tawk lo Juve second half-ah an insiamtha a, Italy forward Federico Chiesa chuan goal a khung hnuah point khat ve ve an insem.